وەزیری ئاوەدانکردنەوە و نیشتەجێکردن دەستپێکردنی کارکردن لە نۆژەنکردنەوەی ڕێگای قەرەداغ-سەنگاو رادەگەیەنێت و جەختیش دەکاتەوە لە ئایندەدا کاری زیاتر لەسەر ئەم پڕۆژەیە دەکەن بۆ ئەوەی بە باشترین شێوە و لە کاتی دیاریکراودا بە ئەنجام بگەیەنرێت.
ئه‌مڕۆ یه‌كشه‌م بە ئامادەبوونی ئاوات شێخ جەناب وەزیری دارایی و ئابووری و دانا عەبدولکەریم وەزیری ئاوەدانکردنەوە و نیشتەجێکردن دەستپێکردنی کارکردن لە پڕۆژەی نۆژەنکردنەوەی رێگای قەرەداغ سەنگاو ڕاگەیەنرا و چووه بواری جێبەجێکردنەوە.
لە کۆنگرەیەکی رۆژنامەوانیشدا، وەزیری دارایی و ئابووری خۆشحاڵی خۆی دەربڕی بە ئامادەبوونی لەو ڕێورەسمەدا و ڕایگەیاند: بۆ من جێگای خۆشحاڵییە کە بۆ جارێکی تر لە پڕۆژەکانی ئاوەدانکردنەوەی ئەم سنوورە بەشداردەبم کە سەرەڕای قەیرانی دارایی و لەگەڵ هەوڵەکان بۆ دابینکردنی مووچەی فەرمانبەران، ئەم جۆرە پڕۆژانەش ئەنجام دەدرێن.
ھاوکات سوپاسی ئەنجوومەنی وەزیران کرد بۆ دەربڕینی ڕەزامەندی لەسەر پڕۆژەکە و گوتی: ئەوە بەری کاری ھاوبەشی حکوومەتی ھەرێم و تەبایی و یەکڕیزیی و بەرنامەی چاکسازییە. هه‌روه‌ها سوپاسی وەزارەتی ئاوەدانکردنەوە و نیشتەجێکردنیشی کرد کە بەو پلان و بەرنامەیەی دایانناوە سەرقاڵی دروستکردن و نۆژەنکردنەوەی ڕێگاوبانەکانی کوردستانن کە ئەوەش دەبێتە بنەمای ژێرخانێکی ئابووری بەھێز.
لای خۆیەوە دانا عەبدولکەریم وەزیری ئاوەدانکردنەوە و نیشتەجێکردن ڕایگەیاند: بەخۆشحاڵییەوە لەگەڵ بەڕێز وەزیری دارایی ھاتووین بۆ سنووری قەرەداغ بۆ دەستپێکی پڕۆژەیەکی گرینگ و جێبەجێکردنی پڕۆژەی نۆژەنکردنەوەی ڕێگای قەرەداغ سەنگاو.
ئاماژەی بەوەش کرد: ئەم پڕۆژەیە جێبەجێکردنی داواکاری ھاووڵاتییانی سنوورەکەیە کە لە ڕابردوودا سەردانی وەزارەتی ئاوەدانکردنەوەیان کردبوو، دواتر بە ھەوڵ و ھیمەتی ھەمووان ڕەزامەندی لەسەر پڕۆژەکە لەلایەن ئەنجوومەنی وەزیرانەوە دەرچوو، ئەمڕۆش بە خۆشحاڵییەوە لێرەین کە وەک یەکەم رۆژی دەستبەکاربوونی پڕۆژەکە دیاریکراوە و ستافی وەزارەتی ئاوەدانکردنەوە و تیمەکانی بەڕێوەبەرایەتی چاککردن و پاراستنی رێگاوبانی سلێمانی پڕۆژەکە جێبەجێ دەکەن.
وەزیری ئاوەدانکردنەوە سوپاسی ئەنجوومەنی وەزیران و وەزیری دارایی کرد بۆ ڕەزامەندی و ھەماھەنگی لەم پڕۆژەیەدا و جەختیشی کردەوە كه ئەوەی لە توانایاندا بێت بۆ خەڵکی ئەم سنه‌ورە و سەرجەم ناوچەکان درێغی ناکەن. هەروەها گوتی كه لە ئایندەدا کاری زیاتر لەسەر ئەم پڕۆژەیە دەکەن و پێداچوونەوە بە دەرخستەکەش دەکەن، بۆ ئەوەی بە باشترین شێوە و لە کاتی دیاریکراودا بە ئەنجام بگەیەنرێت، تاوەکو بە شێوەیەک پڕۆژەکە جێبەجێ بکرێت کە بۆ چەندین ساڵی تر پێویستی بە نۆژەنکردنەوە نەبێت.
پڕۆژەکە بەشێکە لە کارە خزمەتگوزارییەکانی وەزارەتی ئاوەدانکردنەوە و نیشتەجێکردن و پێکهاتووە لە نۆژەنکردنەوەی ڕێگاکە بە درێژیی (21.65)کم، بڕی (725.230.00)ملیۆن دیناری بۆ تەرخانکراوە و بە شێوەیەکی ڕاستەوخۆ لەلایەن بەڕێوەبەرایەتیی چاککردن و پاراستنی ڕێگاوبانی سلێمانییەوە جێبەجێ دەکرێت.
کۆمێنت (0)
تا ئێستا هیچ کۆمێنتێک نەکراوە.