ئێواره‌ی ئه‌مڕۆ یه‌كشه‌ممه به‌ڕێوه‌به‌رایه‌تی ئاسایشی هه‌ولێر ڕاگه‌ێندراوێكی له‌باره‌ی تاوانبارێكی مه‌ترسیدار بڵاوكرده‌وه و تیایدا ڕایگه‌یاند: تاوانبارێكی داواكراو له لایه‌ن دادگاوه كه چه‌ندان فه‌رمانی ده‌ستگیركردنی به مادده‌كانی " تیرۆر" و " هه‌ڕه‌شه" و "كوشتن" هه‌بووه له ڕووبه‌ڕووبوونه‌وه‌یه‌كدا له‌گه‌ڵ هێزه‌كانمان پاش برینداركردنی دوو كارمه‌ند كوژرا.
ده‌قی ڕاگه‌ێندراوه‌كه:
كه‌سێك به‌ناوی " ئه‌حمه‌د حه‌مه‌ده‌مین ڕه‌سول" دانیشتووی شاری هه‌ولێر داواكراو له دادگا به مادده‌ی 406 له ڕێكه‌وتی 23/5/2021 مه‌فره‌زه‌كانمان له هه‌وڵی ده‌ستگیركردنی بوون، داواكراو ته‌قه‌ی لێكردوون و دوو كارمه‌ند و هاووڵاتییه‌ك كه ئافره‌ت بوو به ناوی " ش،و،ر" بریندار بوون و تاوانباریش توانی ڕابكات.
ڕاشیگه‌یاندووه: دواتر تاوانبار به‌رده‌وام هه‌ڕه‌شه‌ی له هاوڵاتییان ده‌كرد و مه‌ترسی بوو له‌سه‌ر گیانی هاووڵاتیان، له ڕێككه‌وتی 18/6/2021 هه‌ڵسا به كوشتنی " فه‌رهاد جه‌بار محه‌مه‌د" و خۆی له شوێنێكی نادیار حه‌شاردا.
ئاسایشی هه‌ولێر هه‌روه‌ها ڕایگه‌یاندووه: تاوانبار 7 فه‌رمانی ده‌ستگیركردنی به مادده‌كانى " تیرۆر" و " هه‌ڕه‌شه" و "كوشتن" هه‌بوو، هه‌ربۆیه لێكۆڵینه‌وه و به‌دواداچوون له لایه‌ن تیمه‌كانمان به‌رده‌وام بوو.
ڕاشیگه‌یاندووه: له ئه‌نجامدا توانرا شوێنی تاوانبار ده‌ستنیشان بكرێت و ئه‌مڕۆ ئێواره ڕێكه‌وتی 5/9/2021 له‌ناو شاری هه‌ولێر له گه‌ڕ‌ه‌كى مه‌هاباد هێزه‌كانمان هه‌وڵی ده‌ستگیركردنیان دا، به‌ڵام تاوانبار بۆ جارێكی دیكه به چه‌ك و ته‌قه‌كردن ڕووبه‌ڕووی هێزه‌كانمان بۆوه و دوو كارمه‌ندی دیكه‌ی بریندار كرد و دواتریش تاوانبار له ڕووبه‌ڕوو بوونه‌وه‌كه‌دا كوژرا.
ئاسایشی هه‌ولێر ڕاشیگه‌یاندووه :لێره‌وه هاووڵاتیان دڵنیا ده‌كه‌ینه‌وه كه‌وا هێزه‌كانمان هه‌میشه له ئاماده‌باشیدان بۆ پاراستنی گیان و ماڵیان، هه‌ركه‌سێكی ده‌رچوو له یاسا ڕووبه‌ڕووی هێزه یاسا پارێزه‌كان ڕابوه‌ستێ ئه‌وا به توندترین شێوه به‌رپرچی ده‌درێته‌وه.
وێنه‌ی تاوانبار " ئه‌حمه‌د حه‌مه‌ده‌مین ڕه‌سول"
کۆمێنت (0)
تا ئێستا هیچ کۆمێنتێک نەکراوە.