له ده‌ست پێكی گه‌ری سێیه‌می خولی بۆندس لیگای ئه‌ڵمانی یانه‌ی بروسیا دۆرتمۆند میوانداری یانه‌ی هۆڤنهایمی كردو زۆر به‌زه‌حمه‌ت و له دوا ساته‌كانی یاریدا سه‌ركه‌وتنی به‌ده‌ست هێنا .
سیگنال ئه‌دۆنا پارك شوێنی به‌یه‌ك گه‌یشتنی هه‌ردوو یانه‌كه بوو ، له گێمی یه‌كه‌م وێرای هه‌ولی یاریزانانی هه‌ردوو یانه بۆ تۆمار كردنی گۆل به‌لام له‌م گێمه هیچ گۆلێك تۆمار نه‌كرا ، له‌گه‌ل ده‌ست پێكردنی گێمی دووه‌م و له خوله‌كی چلو نۆ جیۆڤانی ریبینا گۆلی یه‌كه‌می بۆ خاوه‌ن مال تۆمار كرد، به‌ڵام له خوله‌كی شه‌ست و یه‌ك میوانه‌كان به گۆلی كریستۆڤ بۆمگارته‌ر گه‌رانه‌وه ناو كه‌شی یاریه‌كه‌و ئه‌نجامه‌كه‌یان یه‌كسان كرده‌وه .
هه‌شت خوله‌ك دواتر بروسیا دۆرتمۆند جارێكی تر له‌یاریه‌كه پێشكه‌وت و یاریزان جودی بیلینگهام گۆلی دووه‌می بۆ زه‌رده‌واله‌كان تۆمار كرد.
له خوله‌كی نه‌وه‌ت یاریزان مۆناس دایۆر گۆلی دووه‌می تۆمار كردو جارێكی تر ئه‌نجامی یاریه‌كه‌ی یه‌كسان كرده‌وه ، به‌لام دوو خوله‌ك دواتر ئیرلینك هالاند گۆلی سێیه‌م و سه‌ركه‌وتنی تۆمار كردو بروسیا دۆرتمۆند زۆر به‌زه‌حمه‌ت سێ خالی یاریه‌كه‌ی به‌ده‌ست هێناو به‌شێوه‌یه‌كی كاتی سه‌ركه‌وت بۆ پله‌ی یه‌كه‌می ریزبه‌ندی یانه‌كان ، هۆڤنهایمیش تووشی یه‌كه‌م دۆراندن هات و چوار خالی هه‌یه‌و له‌پله‌ی چواره‌م دێت .
کۆمێنت (0)
تا ئێستا هیچ کۆمێنتێک نەکراوە.