ئه‌ڤرو ئێڤارى 26/8/2021 ل هولا كونفرانسا رێ ورسمێن ده‌ستپێكرنا چالاكیێن قاره‌مانیا (12) ێ یا وه‌لاتێن عه‌ره‌بى بو یاریا كیك بوكسینگێ هاتنه گێران وچه‌ند په‌یڤ وچالاكیێن جورا وجور هاتنه ئه‌نجامدان .
له‌به‌راهیێ قاسم واستى سه‌روكێ ئێكه‌تیا كیك بوكسینكێ یا وه‌لاتێن عه‌ره‌بى دپه‌یڤه‌كێدا سوپاسیا هه‌موولایه‌نان كر كو رێك خوشكریه كو قاره‌مانى ل دهۆكێ بهێته ئه‌نجامدان.
پاش پارێزگارێ دهۆكێ ب نونه‌راتیا به‌رێز مه‌سرور بارزانى سه‌روكێ حكومه‌تا هه‌رێما كوردستانێ خوشحالیا خو ب ئه‌نجامدانا ڤێ قاره‌مانیێ ل پارێزگه‌ها دهۆكێ دیاركر وده‌ست خوشى ل هه‌موو تیمێن پشكدار كر وخواست كو زه‌مینه پتر بهێته خوشكرن دا ئه‌ڤ جوره چالاكیه پتر بهێنه كرن وسه‌ركه‌فتنێ بو تیمێن پشكدار خواست پاش باسل یوسف سه‌روكێ ئێكه‌تیا كیك بوكسینگێ سوپاسیا هه‌موو لایه‌نان كر یێن بوینه هاریكار كو قاره‌مانى ل دهۆكێ بهێته ئه‌نجامدان.
ل دوماهیێ عدنان درجال وه‌زیرێ لاوان ۆ وه‌رزشا عیراقا فیدرال ده‌ستپێكرنا قاره‌مانیێ راگه‌هاند وسه‌ركه‌فتن بو هه‌موو پشكدارا خواست. هه‌ر دچارچوڤێ ڤان رێ ورسمان دا درع وخه‌لات ل سه‌ر وان لایه‌نان هاتنه به‌لافكرن یێن بوینه هاریكارى بو ئه‌نجامدانا قاره‌مانیێ ل دهۆكێ وفلمه‌كێ دیكیومه‌نتارى ل سه‌ر جهێن گه‌شت وگوزارى ل پارێزگه‌هێ هاته نیشان دان وتیمێن قاره‌مانیێ خودانه‌نیاسین وتیپا هونه‌رى یا دهۆكێ تابلویێ پێكڤه ژیانێ نمایشكر. هه‌ژى گوتنێ یه تیمێن پشكدار دقاره‌مانیا دوازدێ یا وه‌لاتێن عه‌ره‌بیدا كو ژ25- 30ى ڤێ مه‌هێ دێ هێته ئه‌نجامدان ئه‌ڤه بوون( ئوردن – سوریا- ئیمارات – مسر – لیبیا – جه‌زائیر – تونس – موریتانیا - فله‌ستین – یه‌مه‌ن – عیراق).
کۆمێنت (0)
تا ئێستا هیچ کۆمێنتێک نەکراوە.