گوته‌بێژی کۆمسیۆن بۆ کوردستان تیڤی لەبارەى دواخستنى هەڵبژاردنی په‌رله‌مانی عێراق روونکردنەوە دەدات

کۆمسیۆنى باڵاى سەربەخۆى هەڵبژاردنەکانى عێراق رەتى دەکاتەوە هەڵبژاردنى  په‌رله‌مانی عێراق  دوابخرێت.
جومانە غەلاى، گوتەبێژى کۆمسیۆنى باڵاى سەربەخۆى هەڵبژاردنەکانى عێراق  به‌ ماڵپه‌ری كوردستان تیڤی رایگه‌یاند: سه‌رجه‌م ئه‌و ده‌نگۆیانه‌ ناراستن  و ره‌تیان ده‌كه‌ینه‌وه‌ كه‌ گوایه‌   هەڵبژاردنى په‌رله‌مانی عێراق دواده‌خرێت بۆ  22 ى 4 ى 2022 .
راشیگه‌یاند: هیچ بریاڕێك نیه‌ بۆ دواخستنی و سه‌رجه‌م ئه‌و لایه‌نه‌ سیاسیانه‌ی كه‌ به‌شداری پرۆسه‌كه‌ ده‌كه‌ن داواكاری له‌و شێوه‌یه‌یان پێش كه‌ش به‌ كۆمسیاران نه‌كردووه‌ كه‌ هه‌ڵبژاردن دوابخرێت.

جومانە غەلاى، گوتەبێژى کۆمسیۆنى باڵاى سەربەخۆى هەڵبژاردنەکانى عێراق ، راشیگه‌یاند:  ئامادەکارییەکانیان بۆ ئەنجامدانى هەڵبژاردن بەردەوامە  کە بڕیارە لە 10 ى تشرینى یەکەمى ئەمساڵ ئەنجام بدرێت.  
گوتیشی: 3249 كاندیدی لایه‌نه‌كان به‌شدارن له‌ هه‌ڵبژاردنه‌كه‌، تا ئێستاكه‌ش هیچ كاندیدێك به‌ فه‌رمی پاشه‌كشه‌ی نه‌كردووه‌ .
 ئه‌وه‌ له‌ كاتێكدایه‌ ، ئه‌مڕۆ چوارشه‌ممه‌ 18 ى 8 ى 2021 ، ژماره‌یه‌ك له‌ میدیای عێراقی و ناوچه‌كه‌ بڵاویان كرده‌وه‌: له‌سه‌ر داواكاری چه‌ند لایه‌نێكی سیاسی كه‌ شه‌وی رابردوو كۆبوونه‌وه‌یه‌ك له‌نێوان ژماره‌یه‌ك سه‌ركرده‌ی عێراقی به‌رێوه‌چووه‌ ، پێشنیاز كراوه‌ هه‌ڵبژاردن بۆ مانگی نیسانی ساڵی 2022 دوابخرێت.

شوان عه‌زیز