پشتی کو لدهۆکێ شەش حالەتێن توشبون ب کۆلکا رەش هاتینە تۆمار کرن، ساخلەمیا دهۆکێ رونکرنەک بەلاڤکر. بەری چەندین رۆژان کەسەکی ل کۆمەلگەها بریفکا یا سەر ب ناوچەداریا کانی ماسێ ڤە ل سنۆرێ دەڤەرداریا ئامێدیێ سەرەدانا پەرستارەکی کریە، کولکەک ل سەر لەشێ وی کەسی بوو، رۆژا پاشتر کەسەکێ دیتر ب هەمان نەخۆشی چوویە دەف پەرستاری کو هەمان کولک هەبوو، لەورا پەرستاری گۆمان ژ وێ کولکێ بریە و پەیوەندی ب ساخلەمیا دەڤەرداریا ئامێدیێ کریە.
ئەڤرۆ شاندەکا هەڤپشک ژ رێڤەبەریا گشتیا ساخلەمیا دهۆکێ، رێڤەبەریا ڤێتێرنەری یا دهۆکێ و رێڤەبەریا ساخلەمیا ئامێدیێ چوویە دەڤەرێ و ل گۆرەی زانیاریان نوکە 6 حالەتێن نەخۆشیا کولکا رەش ل سینورێ کۆمەلگەها بریفکا و گوندێ خشخاشا هاتینە تۆمارکرن و 12 حالەتێن گومانلێکری ژی هەنە.
ژێدەرێ تووشبوونا وان کەسان ئێک ژێدەرە و گاڕانا چێلێن وان گوندانە. هەر لدۆر ڤی بابەتی رێڤەبەرییا کاروبارێن خۆپاراستنا ساخلەمیا دهۆکێ رونکرنەک بەلاڤ کرییە و دبێژیت، نەخۆشیا کولکا ڕەش نەخۆشیەکا نوی نینە و هەموو سالان هندەک حالەت ل جهێن گوندشین و ئاژەلی ب خودان دکەن دهێنە دیتن.
ئاماژە ب ڤێ ئێکێ ژی دکەت کو، نەخۆشیەکا پیستی یە کو کولکەکا ڕەش ژێ پەیدادبیت و چارەسەریا وێ ب ساناهی دهێتەکرن. ئاشکەرا ژی دکەت، ئەڤ نەخۆشیە ژ کەسەکێ نەساخ بو کەسەکێ ساخلەم ناهێتە ڤەگوهاستن، ب تنێ ژ گیانەوەرێن نەساخ بو کەسێن سەرەدەریێ دگەل دکەن دهێتە ڤەگوهاستن.
رێڤەبەریا کاروبارێن خۆپاراستنا ساخلەمیا دهۆکێ دیار ژی دکەت، پشتی گومانا هەبوونا چەند نەخۆشەکان ل سنورێ پارێزگەها دهۆکێ، رێڤەبەریا مە دگەل رێڤەبەریا ڤیتەرنەریا دهۆکێ کارێن پێدڤی بو کونترولکرنێ ئەنجام داینە.
پ/ جیهان ڕه‌سوڵ
کۆمێنت (0)
تا ئێستا هیچ کۆمێنتێک نەکراوە.