نرخی بەرمیلێک خاوی برینت گەیشتە 74 دۆلار و 58 سەنت.
دوێنێ نرخی بەرمیلێک نەوت تا 75 دۆلار و 51 سەنت بەرزبووەوە و رۆژەکەی بە 74 دۆلار و 28 سەنت تەواو کرد. کاتژمێر 09:34ی ئەمڕۆ نرخەکان بەڕێژەی سەدا 0،40 بەرزبوونەوەیان بەخۆوەبینی و بەرمیلێک خاوی برینت بە 74 دۆلار و 58سەنت فرۆشرا.
هاوکات بەرمیلێک خاوی رۆژئاوای تێکساس بە 73 دۆلار و 44 سەنت فرۆشرا.
کەمبوونەوەی یەدەگەکانی نەوتی ئەمریکا، کاریگەری لەسەر بەرزکردنەوەی نرخەکان هەبووە.
سبەی رێکخراوی وڵاتانی هەناردەکاری نەوت (ئۆپیک) لەگەڵ گرووپی وڵاتانی دەرەوەی رێکخراوەکە (ئۆپیک +) کۆدەبنەوە بۆ گفتوگۆکردن لەسەر بڕی بەرهەمهێنانی نەوت لە مانگی ئابدا.
پێشتریش لە کۆبوونەوەی یەکی نیساندا، هەردوولا لەسەر قەبارەی بەرهەمهێنانی رۆژانەی نەوت لە مانگەکانی ئایار، حوزەیران و تەمووز رێککەوتبوون.
لە لایەکی دیکەشەوە مەترسییەکانی ڤایرۆسی کۆرۆنا بەردەوامن و ئەمەش رێگرە لە هەڵکشانی زیاتری نرخەکان، بەڵام لە زۆربەی وڵاتانی جیهاندا ژیان بەرەو ئاساییبوونەوە دەچێت و ئەمەش وای کردووە گەشتوگوزار زیاد بکات و خواستیش لەسەر نەوت زیاتر ببێت.
کۆمێنت (0)
تا ئێستا هیچ کۆمێنتێک نەکراوە.