ب ئاماده‌بوونا پارێزگارێ دهۆکێ و نوونه‌رێ وه‌زاره‌تا نافخۆ رێ ورسمێن جوداکرنا رێڤه‌به‌ریا پۆلیسێن زاخۆ ژ پۆلیسێن دهۆکێ هاتنه‌ گێران

ئه‌ڤرو سپێدێ    16-6-2021  بئاماده‌بونا  د.على ته‌ته‌ر پارێزگارێ دهۆكێ ولیوا تارق احمد نونه‌رێ وه‌زاره‌تا نافخویى رێڤه‌به‌رێ گشتى یێ پولیسێن هه‌رێمێ وعلى عه‌ونى به‌رپرسێ لقێ 8 یێ پارتى ل زاخو وچه‌ند به‌رپرسێن حزبى وئیدارى رێ ورسمێن جوداكرنا رێڤه‌به‌ریا پولیسێن زاخو ژپولیسێن پارێزگه‌ها دهۆكێ هاتنه‌ گێران.
دلشێر عبدالستار  ده‌ڤه‌ردارێ زاخو دپه‌یڤه‌كێدا سوپاسیا سه‌روكێ حكومه‌تێ وپارێزگارێ دهۆكێ ولقێ هه‌شت یێ پارتى  وهه‌موو لایه‌نێن دن كر یێن  بوینه‌ هاریكار  كو رێڤه‌به‌ریا پولیسێن زاخو ژرێڤه‌به‌ریا پولیسێن پارێزگه‌هێ بهێته‌ جوداكرن وراسته‌وخو بكه‌ڤیته‌ سه‌ر رێڤه‌به‌ریا گشتى یا پولیسێن هه‌رێمێ وخواست كو هه‌موو رێڤه‌به‌ریێن دن ل سه‌ر ئاستێ زاخو بهێنه‌ كاراكرن.
پاش  لیوا تارق احمد نونه‌رێ وه‌زاره‌تا نافخویى رێڤه‌به‌رێ گشتى یێ پولیسێن هه‌رێمێ بناڤێ خو و وه‌زیرێ نافخو پیروزباهیا خه‌لكێ زاخو كر بو گرێدانا پولیسێن زاخو ب رێڤه‌به‌ریا گشتى یا پولیسێن هه‌رێمێ ڤه‌ ودیاركر كو بریار ده‌رچویه‌ كو رێڤه‌به‌ریا پولیسێن هاتن وچونێ وبه‌رگریا شارستانى ژى بهێنه‌ جوداكرن وئه‌ڤه‌ هه‌موو ژبو هندێ یه‌ كو خزمه‌تا خه‌لكێ ده‌ڤه‌رێ باشتر بهێته‌  كرن .
پاش پارێزگارێ دهۆكێ دپه‌یڤه‌كێدا گوت: به‌رێز مسرور بارزانى سه‌روكێ حكومه‌تا هه‌رێما كوردستانێ زور یێ رژده‌ كو ده‌ڤه‌رداریا زاخو ببیته‌ ئیداره‌كا سه‌ربخو وئه‌ڤرو ئێكه‌م پێنگاڤ ده‌ستپێكر ئه‌وژى جوداكرنا رێڤه‌به‌ریا پولسێن زاخو ژپولیسێن  پارێزگه‌هێ یه‌ ول ده‌مه‌كێ نێزیك فه‌رمانگه‌هێن دن ژى وه‌كو په‌روره‌ده‌ وته‌ندورستى  وئه‌وقاف و...هتد دێ هێنه‌ جوداكرن ئه‌ڤه‌ بو  هندێ یه‌ كو ده‌ستهه‌لاتێن كارگێرى بهێنه‌ شوركرن وئاسنكارى بهێنه‌ كرن وخزمه‌تا هاولاتیان باشتر بهێته‌ كرن.
پارێزگارێ دهۆكێ ته‌كه‌زكر كو نه‌خوشیا كورونایێ وپه‌یدابوونا قه‌یرانا دارایى ئاسته‌نگى ل هه‌مبه‌ر پلانێن حكومه‌تا هه‌رێمێ چێكرن لێ حكومه‌تێ به‌رده‌وامیدا گه‌هاندنا پرۆژێن خزمه‌تگوزارى بو هه‌موو هاولاتیان وپیروزباهیا خه‌لكێ زاخو كر وخواست كو ده‌زگه‌هێن ئێمناهیێ ل زاخو پتر ژجاران هه‌ڤكار وهاریكاربن دگه‌ل هه‌موو سازیێن ته‌ناهیێ ل پارێزگه‌ها دهۆكێ بو وێ یه‌كێ ئاسایشا خه‌لكێ ده‌ڤه‌رێ به‌رده‌وام بهێته‌ پاراستن وئاڤه‌دانكرنا ده‌ڤه‌رێ پتر پێشبكه‌ڤیت.
پاش رێ ورسمێن جودابوونێ دناڤبه‌را عمید فخرى احمد رێڤه‌به‌رێ پولیسێن پارێزگه‌ها دهۆكێ وموقه‌دم نزار سلێمان رێڤه‌به‌رێ پولیسێن زاخو هاتنه‌ واژوكرن.