ئه‌مڕۆ سێشەمە، علی حسێن بەرپرسی مەکتەبی پەیوەندییەکانی کوردستانی و عێراقی پارتی دیموکراتی کوردستان، بەئامادەبوونی بەرپرسی دیسکی پارتە کوردستانییەکان و ئەندامانی مەکتەب، پێشوازی لەشاندێکی ژووری پەیوەندییە سیاسییه‌كانى بزووتنەوەی گۆران کرد.
کەپێکهاتبوون لە بەختیار عمر بەرپرسی ڕێکخەری ژووری پەیوەندییە سیاسیەکانی بزووتنەوەی گۆران و شاندێکی ژووری پەیوەندییەکان. له كۆبوونه‌وه‌یەكدا، وێرای خستنەرووی بارودۆخى سیاسی هەرێمی کوردستان و عێراق و ناوچه‌كه، پرسی په‌یوه‌ندییەکانی پارتی دیموکراتی کوردستان و بزووتنەوەی گۆران و په‌یوه‌ندیى نێوان پێكهاته‌و لایه‌نه سیاسییه‌كانی کوردستان تاوتوێ كرا.
هەرلەکۆبونەوەکەدا باس لە هه‌ڵبژاردنه‌كانى عێراق و پێویستى و گرنگیى یه‌كڕیزى و ته‌بایى، گفتوگۆ و لێكگه‌یشتن له‌نێوان لایه‌نه سیاسییه‌كانی هەرێمی کوردستان، لە ئێستا و دوایی هەلبژاردنەکان کرا .
هەروەها تەئکید لەو هەماهەنگیانە لەپێناو چاره‌سه‌ركردنى كێشه‌كانی نێوان هەولێر و بەغدا بۆ ئەوەی قۆناخێک بێتەکایەوە ڕێخۆشكه‌ر بێت بۆ چاره‌سه‌ركردنى كێشه‌كانى نێوان هه‌ردوولا له‌سه‌ر بنه‌ماى ده‌ستوور و له چوارچێوه‌ى سیستمى فیدراڵی.
هاوکات هێنانە پێشەوەی پرسی دەستوری هەرێمی کوردستان و هه‌ستكردن به به‌رپرساریه‌تیى هه‌مووان بۆ ئاینده‌یەکی باشترو پێكه‌وه‌كاركردن و جه‌خت کردنەوە له پرۆسه‌ى چاكسازى بۆ باشتركردنى گوزه‌ر‌انى هاووڵاتیان کرایەوە. هەر لەو کۆبونەوەیە تەئکید لە به‌رده‌وامیى ئەمشێوە كۆبوونه‌وانەی نێوان هەردوولا كرایەوە.
کۆمێنت (0)
تا ئێستا هیچ کۆمێنتێک نەکراوە.