په‌رله‌مانی کوردستان خوێندنه‌وه‌ی دووه‌م بۆ پڕۆژه‌ یاسای وه‌زاره‌تی کاره‌با ده‌کات

په‌رله‌مانی كوردستان كۆده‌بێته‌وه‌ و كارنامه‌ی دانیشتنه‌كه‌ی راگه‌یاندرا.
له‌راگه‌یاندراوێكدا ده‌سته‌ی سه‌رۆكایه‌تی په‌رله‌مانی كوردستان بڵاوی كرده‌وه‌:  رۆژی چوارشه‌مه‌ی داهاتوو 5 ى 5 ى 2021، په‌رله‌مانی كوردستان كۆده‌بێته‌وه‌ و تاووتووێی سێ پێشنیازه‌ یاسا ده‌كرێت .
هه‌روه‌ها له‌به‌شێكی دیكه‌ی راگه‌یاندراوه‌كه‌دا هاتووه‌: كه‌هه‌ر له‌و دانیشتنه‌دا خوێندنه‌وه‌ی دووه‌م بۆ پڕۆژه‌ یاسای وه‌زاره‌تی كاره‌با ده‌كرێت .

ده‌قی كارنامه‌ی دانیشتنی په‌رله‌مان:

به‌پێی حوكمی مادده‌ی (5)و بڕگه‌كانی (یه‌كه‌م و دووەم و سێیەم) له‌مادده‌ی (16)و بڕگه‌ی (سێیه‌م) له‌مادده‌ی (18)و بڕگه‌كانی (یه‌كه‌م و دووه‌م و سێیه‌م و چواره‌م و پێنجه‌م) له‌مادده‌ی (20)و مادده‌كانی (47، 48، 52، 54، 55، 56، 57) له‌په‌یڕه‌وی ناوخۆی په‌رله‌مانی كوردستان-عێراق، ده‌سته‌ی سه‌رۆكایه‌تیی په‌رله‌مان بڕیاریدا به‌رنامه‌ی كاری دانیشتنی ژماره‌ (12)ی ئاسایی خولی بەهارەی ساڵی سێیەم له‌خولی پێنجه‌می هه‌ڵبژاردنی په‌رله‌مان له‌كاتژمێر (11)ی پێشنیوه‌ڕۆى ڕۆژی چوارشەممە رێكه‌وتی 2021/5/5، به‌م شێوه‌یه‌ بێت:
یەكەم: خوێندنه‌وه‌ی یەكەم بۆ ئەم پێشنیازەیاسایانەی خوارەوە، به‌پێی حوكمی مادده‌كانی (79، 80) له‌په‌یڕه‌وی ناوخۆی په‌رله‌مانی كوردستان:
1. پێشنیازەیاسای (پاراستنی بەڵگەنامە و دەستنووسەكان).
2. پێشنیازەیاسای (پاراستنی بەڵگەنامەی هەرێمی كوردستان-عێراق).
3. پێشنیازەیاسای (پاراستنی بەڵگەنامە و ئەرشیفی نەتەوەیی لەهەرێمی كوردستان).
دووەم:خستنەڕووی بیرۆكەی پەرلەمانتار (لیزا فلك الدین صابر) پەیوەست بە (وزەی خۆر وەك سەرچاوەیەك بۆ بەرهەمهێنانی كارەبا لەهەرێمی كوردستان) بەپێی حوكمی خاڵی (2)ی بڕگەی (یەكەم)ی ماددەی (49) لەپەیڕەوی ناوخۆی پەرلەمانی كوردستان-عێراق.
سێیەم: خوێندنه‌وه‌ی دووه‌م بۆ پرۆژەیاسای (وەزارەتی كارەبا لەهەرێمی كوردستان-عێراق) به‌پێی حوكمی مادده‌كانی (87، 88، 89) له‌په‌یڕه‌وی ناوخۆی په‌رله‌مانی كوردستان.