سەفین دزەیی هێرشە تیرۆریستیەکه‌ی سه‌ر هه‌ولێر ئیدانه‌ ده‌کات

بەرپرسی فەرمانگەی پەیوەندییەکانی دەرەوەی حكوومه‌تی هەرێمی کوردستان هێرشە تیرۆریستیە ترسنۆکانەیەی سه‌ر هه‌ولێر ئیدانه‌ ده‌كات.

سەفین دزەیی رایگه‌یاند: زۆر بە توندی سەرکۆنەی ئەو هێرشە تیرۆریستیە ترسنۆکانەیە دەکەم کە ئەمشەو کرایە سەر فڕۆکەخانەی نێودەوڵەتی هەولێر.

ئەم کردەوانە بەهیچ جۆرێک ناتوانێ  گەلی کوردستان لە پێکەوە ژیانی ئاشتیانەو ئاسایش و سەقامگیری دابڕێنێ کە ئەرکی هەرە لە پێشی ئێمەیە.

سەفین دزەیی گوتی: تەواوی نێردە دیپلۆماسیەکان و ئاژانسە نێودەوڵەتیەکان و ڕێکخراوە ناحکومیەکان و بیانیانی دانیشتووی هەولێر دڵنیا دەکەمەوە کە حکومەتی هەرێمی کوردستان هەموو توانای خۆی بەکاردێنێ بۆ ئاشکرا کردنی ئەنجامدەرانی ئەو هێرشەو پاراستن و دابینکردنی ئاسایشی تەواو بۆ هەمووان و سزادانی تاوانباران.

شایه‌نی باسه‌ رۆژی چوارشه‌ممه‌ له‌ڕێگه‌ی موشه‌ك و دڕۆنه‌وه‌ فڕۆكه‌خانه‌ی هه‌ولێری نێوده‌وڵه‌تی و بنكه‌ی هاوپه‌یمانان و چه‌ند ناوچه‌یه‌كی تر له سنوری ‌باشیك كرانه‌ ئامانج.