شانه‌ی قه‌یرانه‌كانی سه‌ر ئه‌نجومه‌نی نوێنه‌رانی عێراق ئه‌مڕۆ چوارشه‌ممه وورده‌كاری نوێی سه‌باره‌ت به كاتژمێره‌كانی قه‌ده‌غه‌ی هاتوچۆ له‌مانگی ره‌مه‌زان ئاشكرا كرد.
له‌مباره‌یه‌وه جه‌واد موسه‌وی، بڕیارده‌ری شانه‌ی قه‌یرانه‌كان له‌لێدوانێكیدا بۆ ده‌زگاكانی راگه‌یاندن گوتی: رێوشوێنه‌كانی قه‌ده‌غه‌ی هاتوچۆ له‌مانگی ره‌مه‌زان هه‌روه‌كو خۆی ده‌مێنێ و رۆژانی هه‌ینی و شه‌ممه قه‌ده‌غه‌ی هاتوچۆی ته‌واو ده‌بێت و قه‌ده‌غه‌ی رێژه‌ییش دوای به‌ربانگ راسته‌وخۆ ده‌ست پێده‌كات .
جه‌واد موسه‌وی جه‌ختیكردۆته‌وه كه پێویسته هاووڵاتیان پابه‌ندی رێنماییه‌كانی ته‌ندروستی بن .
هه‌روه‌ها بڕیارده‌ری شانه‌ی قه‌یرانه‌كان داوای له هێزه ئه‌منییه‌كان كرد كه رێوشوێنه‌كانی سه‌ڵامه‌تی و ته‌ندروستی توندتر بكه‌نه‌وه.
شایانی باسه دوێنێ وه‌زاره‌تی ته‌ندروستی عێراق بڵاویكرده‌وه كه له‌ماوه‌ی 24 كاتژمێردا حه‌وت هه‌زار و 300 كه‌س تووشی ڤایرۆسی كۆرۆنای نوێ بوون و 33 كه‌سیش به‌هۆی ڤایرۆسه‌كه‌وه گیانیان له‌ده‌ستداوه .
کۆمێنت (0)
تا ئێستا هیچ کۆمێنتێک نەکراوە.