په‌رله‌مانی کوردستان خوێندنه‌وه‌ بۆ دوو پێشنیازه‌ یاسا ده‌کات

ده‌سته‌ی سه‌رۆكایه‌تی په‌رله‌مانی كوردستان بڵاوی كرده‌وه‌: رۆژی چوارشه‌ممه‌ی داهاتوو 7 ى 4 ى 2021 ، دانیشتنی ژماره‌ 6 ى ئاسایی خولی به‌هاره‌ به‌رێوه‌ده‌چێت.
راشیده‌گه‌یه‌نن: له‌دانیشتنه‌كه‌دا تاووتووێی 2 پێشنیازه‌ ده‌كرێت و هه‌روه‌ها  تاتووێی خستنه‌ ڕووی بیرۆكه‌ی پەرلەمانتارمەم بورهان محمد پەیوەست بە (حكومڕانیی بیرۆكراسی ده‌كرێت.

ده‌قی  راگه‌یاندراوی ده‌سته‌ی سه‌رۆكایه‌تی  په‌رله‌مانی كوردستان:

به‌رنامه‌ی كاری دانیشتنی ژماره‌ (6)ی ئاساییی خولى به‌هاره‌ رۆژی 2021/4/7

به‌رنامه‌ی كار
به‌پێی حوكمی مادده‌ی (5)و بڕگه‌كانی (یه‌كه‌م و دووەم و سێیەم) له‌مادده‌ی (16)و بڕگه‌ی (سێیه‌م) له‌مادده‌ی (18)و بڕگه‌كانی (یه‌كه‌م و دووه‌م و سێیه‌م و چواره‌م و پێنجه‌م) له‌مادده‌ی (20)و مادده‌كانی (47، 48، 52، 54، 55، 56، 57) له‌په‌یڕه‌وی ناوخۆی په‌رله‌مانی كوردستان-عێراق، ده‌سته‌ی سه‌رۆكایه‌تیی په‌رله‌مان بڕیاریدا به‌رنامه‌ی كاری دانیشتنی ژماره‌ (6)ی ئاسایی خولی بەهارەی ساڵی سێیەم له‌خولی پێنجه‌می هه‌ڵبژاردنی په‌رله‌مان له‌كاتژمێر (11)ی پێشنیوه‌ڕۆى رۆژی چوارشەممە رێكه‌وتی 2021/4/7، به‌م شێوه‌یه‌ بێت:
یه‌كه‌م: خوێندنه‌وه‌ی دووه‌م بۆ پێشنیازەیاسای (هاوردەكردن و فرۆشتنی بەرهەمە نەوتییەكان لەهەرێمی كوردستان-عێراق) به‌پێی حوكمی مادده‌كانی (87، 88، 89) له‌په‌یڕه‌وی ناوخۆی په‌رله‌مانی كوردستان.
دووەم: خوێندنه‌وه‌ی یەكەم بۆ ئەم پێشنیازەیاساو بڕیارانەی خوارەوە به‌پێی حوكمی مادده‌كانی (79، 80) له‌په‌یڕه‌وی ناوخۆی په‌رله‌مانی كوردستان:
1. پێشنیازەیاسای ڕێكخستنی ئامێرەكانی چاودێری لەهەرێمی كوردستان-عێراق.
2. پێشنیازەبڕیاری ڕۆژی ڕۆژنامەگەریی كوردی لەهەرێمی كوردستان-عێراق.
سێیەم: خستنەڕووی بیرۆكەی بەڕێز پەرلەمانتار (مەم بورهان محمد) پەیوەست بە (حكومڕانیی بیرۆكراسی) بەپێی حوكمی خاڵی (2)ی بڕگەی (یەكەم) لەماددەی (49)ی پەیڕەوی ناوخۆی پەرلەمانی كوردستان-عێراق.