مەكتەبی سیاسی پارتی دیموكراتی كوردستان بە بۆنەی هاتنەوەی(21ی ئادار)جەژنی نەتەوەیی نەورۆز و سەری ساڵی كوردیی په‌یامێكی پیرۆزبایی بڵاوكرده‌وه رایگه‌یاند: هیوادارین گەلەكەمان و سەرجەم كوردستانیانی خۆشەویست لە ژێر چەتری ئاسوودەیی و ئارامی دا لە خۆشگوزەرانی دابن.
بە بۆنەی هاتنەوەی(21ی ئادار)جەژنی نەتەوەیی نەورۆز و سەری ساڵی كوردییەوە، پیرۆزباییەكی گەرم لە گەلەكەمان لە هەرێمی كوردستان و لە سەرانسەر جیهان دەكەین، بەشێوەیەکی زۆر تایبەت پیرۆزبایی لە خانەوادە و كەسوكاری سەربەرزی شەهیدە نەمرەكان دەكەین و، چەپكە گوڵی نێرگزی ئومێد و سەركەوتن پێشكەش بە هێزە نەبەردەكانی پێشمەرگە دەكەین.
نەورۆز نەریتێكی نەمر و جەژنێكی دێرین و نەتەوەیی گەلی كوردە، رەمز و سیمبولی بەرخودان و خۆراگری و سروشبەخشی گەشانەوە و بووژانەوەیە، هەروەها بەدرێژایی مێژووی نەتەوە و گەلەكەمان هەوێنی سەرهەڵدان و شۆڕش و رووبەڕووبوونەوەی ستەم و زۆرداریی بووە.
بەو بۆنە پیرۆزە و جەژنە نەتەوەییەمان جارێكی دیكە پشتیوانی تەواوی خۆمان بۆ دەستەبەركردنی مافە نەتەوەیی و نیشتیمانییەكانی گەلەكەمان دووپات دەكەینەوە و كاردەكەین بۆ پتەوتركردنی هەماهەنگی و یەكهەڵوێستی سەرجەم حزب و لایەنە سیاسیەكانی كوردستان بۆ چارەسەركردنی كێشە و گیروگرفتەكان، هەروەها هیواخوازین جەژنی نەورۆزی ئەمساڵ دەرفەتێك بێت بۆ برەودانی زیاتر بە رەوتی تێكۆشانی نەتەوەیی و نیشتیمانیمان بۆ بەدیهاتنی تەواوی مافەكانمان.
جەژنی نەورۆزمان هاوكاتە لەگەڵ ساڵڕۆژی سەرهەڵدان و راپەڕینی شاری كەركووكی دڵی كوردستان لە (٢١ـی ئاداری ١٩٩١)، هەر بەو بۆنەیەوە پیرۆزباییەكی گەرمی تێكۆشان لە هاووڵاتیان و خەڵكی ئەو شارە خۆشەویستە دەكەین و هیوای بەختەوەری و ئاسوودەییان بۆ دەخوازین، هەروەها وەك هەمیشە پێدادەگرین و سوور دەبین لەسەر گرنگی و كاریگەری رۆڵی شەرعی هەرێمی كوردستان بۆ چارەسەركردنی ئەو كێشە و گیروگرفتانەی پەیوەستن بە دواڕۆژی مافەكانی گەلەكەمان لە شاری كەركووك و ناوچە کوردستانییەکانی دیکەی دەرەوەی ئیدارەی ھەرێم بەپێی دەستوور و، سەندنەوەی مافە پێشێلكراوەكانی گەلەكەمان.
دووبارە سەری ساڵی نوێ و جەژنی نەورۆز و راپەڕینی شاری كەركووكی دڵی كوردستان لە رۆڵەكانی گەلەكەمان پیرۆز بێت، هیوادارین گەلەكەمان و سەرجەم كوردستانیانی خۆشەویست لە ژێر چەتری ئاسوودەیی و ئارامی دا لە خۆشگوزەرانی دابن و هەر ساغ و تەندروست بن و وڵاتەكەشمان ئاوەدانتر و پێشكەوتووتر بێت..
مەكتەبی سیاسی
پارتی دیموكراتی كوردستان
20ـی ئاداری 2021
کۆمێنت (0)
تا ئێستا هیچ کۆمێنتێک نەکراوە.