سوپای عێراق پووچه‌ڵكردنه‌وه‌ی ھه‌وڵێكی دزه‌كردنی تیرۆریستانی داعش له سووریاوه بۆ ناو عێراق راگه‌یاند.
ئاژانسی ھه‌واڵیی فه‌رمی عێراق به پشت به‌ستن به راگه‌یه‌نراوێكی فه‌رمانده‌یی ئۆپه‌راسیۆنه ھاوبه‌شه‌كانی عێراق بڵاویكرده‌وه كه شه‌وی رابردوو، ھێزێكی فه‌وجی سێ سه‌ربه لیوای شه‌ش له فه‌رمانده‌یی ناوچه‌ی شه‌شی سنوور، به‌رپه‌رچی ھه‌وڵێكی دزه‌كردنی ژماره‌یه‌ك تیرۆریستانی داعشیان له‌ناو خاكی سووریاوه به ئاراسته‌ی سنووری كارگێڕی ناوچه‌ی دوكچی رۆژئاوای چیای شنگال داوه‌ته‌وه .
سوپای عێراق ده‌شڵێت: شه‌ڕ و پێكدادان له‌نێوان ھێزه‌كانی فه‌وجی سێ و ژماره‌یه‌ك تیرۆریستی داعش له چیای شنگال روویداوه كه 30ی خوله‌ك به‌رده‌وام بووه و له میانیدا، ھه‌وڵه‌كه پووچه‌ڵكراوه‌ته‌وه و تیرۆریستانی داعش به‌ره‌و سووریاوه ھه‌ڵاتوون.
سوپای عێراق ئاماژه‌ی به‌وه‌یشدراوه كه دواتر ھێزه‌كانی پاسه‌وانی سنوور، ئۆپه‌راسیۆنێكیان به ئامانجی راوه‌دوونانی تیرۆریستانی داعش له چیای شنگال ئه‌نجامداوه كه له میانیدا، تیرۆریستانی داعش له ناوچه‌كه ھه‌ڵاتوون و له میانی ئۆپه‌راسیۆنه‌كه‌یشدا، پاسه‌وانێكی سنوور كوژراوه.
کۆمێنت (0)
تا ئێستا هیچ کۆمێنتێک نەکراوە.