ئه‌ندامی ئه‌نجوومه‌نی نوێنه‌رانی ئه‌مریكا، رۆن رایت دوای تووشبوونی به ڤایرۆسی كۆرۆنا گیانی له‌ده‌ست دا و بووه یه‌كه‌م ئه‌ندامی كۆنگرێس كه به‌هۆی ئه‌و په‌تایه‌وه گیانی له‌ده‌ستدابێت.
به‌گوێره‌ی راگه‌یه‌ندراوێكی نووسینگه‌ی نوێنه‌ری پارتی كۆماری له ویلایه‌تی تێكساس، رۆن رایت-ی ته‌مه‌ن 67 ساڵ له حه‌وتی شوباتدا له شاری داڵاس گیانی له‌ده‌ستداوه.
له راگه‌یه‌ندراوه‌كه‌دا ئه‌وه‌ش خراوه‌ته‌ڕوو كه رۆن رایت له ساڵی 2019وه تووشی شێرپه‌نجه‌ی سییه‌كان بووبوو، به‌ڵام تا ساتی گیان له‌ده‌ستدانی له پۆسته‌كه‌ی به‌رده‌وام بوو.
باس له‌وه‌شكراوه كه رۆن رایت له 21ی كانوونی دووه‌می رابردوو تووشی كۆرۆنا بووبوو، له‌سه‌ره‌تادا به‌سووكی نیشانه‌كانی تیاده‌ركه‌وت، به‌ڵام دواتر ره‌وشی ته‌ندروستی تێكچوو و ره‌وانه‌ی نه‌خۆشخانه كرا.
ئه‌مریكا له هه‌موو وڵاتانی جیهان زیاتر كه‌وتووه‌ته ژێر كاریگه‌ری ڤایرۆسی كۆرۆنای نوێ و تا ئێستا زیاتر له 27 ملیۆن حاڵه‌تی تووشبوون به په‌تاكه‌ی تیادا تۆمار كراوه، ژماره‌ی ئه‌و تووشبووانه‌شی كه به‌هۆی په‌تاكه‌وه گیانیان له‌ده‌ستداوه 475 هه‌زاری تێپه‌ڕاندووه.
کۆمێنت (0)
تا ئێستا هیچ کۆمێنتێک نەکراوە.