وه‌زیری پێشمه‌رگه‌ی حكومه‌تی هه‌رێم و باڵیۆزی به‌ریتانیا له‌عێراق جه‌ختده‌كه‌نه‌وه له‌سه‌ر گه‌یشتن به‌رێككه‌وتنی گشتگیر و دادپه‌روه‌رانه له‌نێوان وه‌زاره‌تی به‌رگری و وه‌زاره‌تی پێشمه‌رگه له‌پێناو پاراستنی ئاسایش و سه‌قامگیری ناوچه‌كه و بنبڕكردنی ته‌واوه‌تی تیرۆرو تیرۆریستان.
ئه‌مرۆ شه‌ممه 1ی2ی 2021 شۆڕش ئیسماعیل، وه‌زیری پێشمه‌رگه‌ی حكومه‌تی هه‌رێمی كوردستان، پێشوازیكرد له ستیڤن هیكی، باڵیۆزی به‌ریتانیا له‌عێراق.
له‌كۆبونه‌وه‌یه‌كدا، كه جه‌یمس سۆرنتۆن، كونسڵی گشتیی به‌ریتانیا له‌هه‌ولێر و كۆلۆنێل چارڵی، فه‌رمانده‌ی هێزه‌كانی به‌ریتانیا له‌هه‌رێم و به‌رپرسی سیاسی بۆ ناوچه‌جێناكۆكان له‌كونسوڵخانه‌ی ئه‌و ووڵاته له‌هه‌ولێر و ئه‌مینداری گشتیی وه‌زاره‌تی پێشمه‌رگه‌و ئه‌فسه‌رانی پله باڵای وه‌زاره‌ت ئاماده‌یبوون، وه‌زیری پێشمه‌رگه رایگەیاند: هاوكاری راوێژكارانی بەریتانیا لە پڕۆسه‌ی ریفۆرمی وه‌زاره‌ت و یه‌كخستن و خۆرێکخستنەوەی هێزه‌كاندا گرنگه، له‌ئێستادا پڕۆسه‌كه به‌رده‌وامه‌و بۆ گه‌یشتن به‌ئامانجی كۆتایش پێویستیمان به‌رێككه‌وتنی سیاسی حزب و لایه‌نه‌كان هه‌یه، بۆ ئه‌مه‌ش داوایكرد هاوكاری و هه‌ماهه‌نگییه‌كانی به‌ریتانیا له‌مڕوه‌و فراوانتر و به‌رده‌وام بێت.
باڵیۆزی به‌ریتانیا له‌عێراق، ئاماژه‌ی به‌وه‌كرد، له‌نزیكه‌وه چاودێر و هه‌ماهه‌نگی پڕۆسه‌ی چاكسازی ده‌كه‌ن و به‌گرنگیه‌وه ده‌ڕواننه پێشكه‌وتنه‌كانی ئه‌و پڕۆسه‌یه.
له باره‌ی په‌یوه‌ندییه‌كانی نێوان سوپای عێراقی و هێزی پێشمه‌رگه و دۆخی ناوچه كوردستانییه‌كانی ده‌ره‌وه‌ی هه‌رێم، وه‌زیری پێشمه‌رگه رایگه‌یاند: تاكه رێگه‌ی سه‌قامگیری و ئارامی ئه‌و ناوچانه به‌یه‌كه‌وه كاركردنی هێزی پێشمه‌رگه‌و سوپای عێراقه له‌رێگه‌ی گه‌یشتن به‌رێككه‌وتنێكی هه‌مه‌لایه‌نه، وتیشی: به‌داخه‌وه له‌ئێستادا دۆخی ئه‌و ناوچانه خراپه‌و، له‌لایه‌ن هه‌ندێ عه‌قڵیه‌تی شۆڤێنیه‌وه پڕۆسه‌ی به‌عه‌ره‌بكردن و كۆچی زۆره ملێی كوردانی ئه‌و ناوچانه به‌ڕێوه‌ده‌برێت، ئه‌مه به‌هه‌موو شێوه‌یه‌ك ره‌تده‌كه‌ینه‌وه‌و لەگەڵ پێکەوەژیانی ئاشتیانەی نەتەوەو پێکهاتەکان یەکناگرێتەوەو قبوڵکراو نیە، هیواشمان خواست، حكومه‌تی به‌ریتانیا رۆڵی خۆیان بگێڕن له‌فشارو رێگریكردن له‌و پڕۆسه ناده‌ستوورییه‌دا.
باڵیۆزی به‌ریتانیا له‌عێراق ته‌ئكیدی كرده‌وه، كه ئه‌وان هه‌وڵه دیبلۆماسیه‌كانی خۆیان له‌وباره‌وه ده‌خه‌نه‌گه‌ڕو به‌وردیش كار ده‌كه‌ن له‌سه‌ر نزیككردنه‌وه‌ی هه‌ردوولاو پێكهێنانی خاڵی هه‌ماهه‌نگی هاوبه‌ش له‌نێوان هه‌ردوولادا.
كۆبوونه‌وه به‌گفتوگۆكردن له‌سه‌ر مه‌سه‌له‌ی به‌ره‌نگاربوونه‌وه‌ی تیرۆر و تیرۆریستان له‌ناوچه‌كه و هه‌وڵه‌كان به‌ئاراسته‌ی پێكه‌وه كاركردن و یه‌كگرتوویی هێزه‌كان و گفتوگۆی راشكاوانه‌ی هه‌مه‌لایه‌نه له‌سه‌ر له‌مپه‌رو ئاسته‌نگه‌كان به‌كۆتا هات.
کۆمێنت (0)
تا ئێستا هیچ کۆمێنتێک نەکراوە.