له‌ هه‌ولێر رێز له‌ قوربانییانی ته‌قینه‌وه‌کانی یه‌کی شوبات گیرا

ئه‌مڕۆ دووشه‌ممه‌ 1 ى  2 ى 2021 ،  17 ساڵ به‌سه‌ر ته‌قینه‌وه‌كانی یه‌كی شوبات له‌ باره‌گاكانی پارتی و یه‌كێتی له‌ هه‌ولێر تێده‌په‌ڕێت .
 17 ساڵ له‌مه‌وبه‌ر و له‌ 1ی شوباتی 2004، له‌ هه‌ریه‌ك له‌ باره‌گاكانی لقی 2ی پارتی دیموكراتی كوردستان و مه‌ڵبه‌ندی 3ی یه‌كێتی نیشتمانی كوردستان، له‌كاتی پێشوازیكردن له‌ میوانان بۆ جه‌ژنه‌ پیرۆزه‌، دوو ته‌قینه‌وه‌ هه‌ردوو باره‌گای لقی دووی  پارتی دیموكراتی كوردستان  و مه‌ڵبه‌ندی سێی یه‌كێتی نیشتیمانی كوردستان به‌ئامانج گرت ، به‌هۆیه‌وه‌ چه‌ندین سه‌ركرده‌ و كادر و هاووڵاتی  له‌هه‌ردوو پارتدا شه‌هید و برینداربوون.
 ئه‌مڕۆش له‌ هه‌ولێر و له‌ مۆنۆمێنتی تایبه‌ت به‌ شه‌هیدانی ته‌قینه‌وه‌كانی یه‌كی شوبات، به‌ئاماده‌بوونی ژماره‌یه‌ك له‌ به‌رپرسانی حكومی و پارت و لایه‌نه‌كانی  هه‌رێمی كوردستان و كه‌س و كاری شه‌هیدان ، له‌لایه‌ن ئاماده‌بووانه‌وه‌  تاجه‌گوڵینه له‌سه‌ر مۆنۆمێنتی شه‌هیدان دانرا.