مه‌كته‌بی سیاسی پارتی دیموكراتی كوردستان رایده‌گه‌ێنێت: یەک ریزی لایەنە سیاسیەکانی کوردستان دەستەبەری پاراستنی دەستکەوتەکانی گەلی کوردستانە .
ئه‌م په‌یامه‌ی مه‌كته‌بی سیاسی له‌میانی پیرۆزبایی پارتی دیموكراتی كوردستانه بۆ (26)ەمین ساڵیادی دامەزراندنی پارتی كرێكاران و رەنجدەرانی كوردستان
ده‌قی په‌یامه‌كه‌ی مه‌كته‌بی سیاسی.
پەیامی پیرۆزبایی مەكتەبی سیاسی پارتی بۆ (26)ەمین ساڵیادی دامەزراندنی پارتی كرێكاران و رەنجدەرانی كوردستان
بەڕێز/ باپیر كامەلا سكرتێری گشتی پارتی كرێكاران و رەنجدەرانی كوردستان
بەڕێزان/ ئەندامانی مەكتەبی سیاسی و ئەنجوومەنی سەركردایەتی پارتی كرێكاران و رەنجدەرانی كوردستان
بەبۆنەی(26)هەمین ساڵیادی دامەزراندنی پارتی كریكاران و رەنجدەرانی كوردستان، پیرۆزباییەكی گەرم ئاراستەی ئێوەی بەڕێز و سەرجەم كادیر و ئەندام و لایەنگرانی حزبە تێکۆشەرەکەتان دەكەین و، هیوای بەردەوامی و سەرکەوتنتان بۆ دەخوازین.
رۆڵی پارتەكەتان و ھاوپەیمانی و پەیوەندییەکانی نێوانمان بۆ پاراستنی دەسكەوتەكان و گەیشتن بە ئامانجەكانمان، جێگەی بایەخە، بۆیە لەمەودواش زیاتر پێویستیمان بە هەماهەنگیی و یەكڕیزیی هەیە بۆ بەهێزكردنی دامەزراوە شەرعیەكان و قەوارەی هەرێمی كوردستان و پتەوكردنی بنەماكانی ئازادی و دیموكراسی.
بارودۆخی عێراق وناوچەکە بەقۆناخێکی هەستیار و چارەنوسسازدا دەروات، ئەمەش لە هەموو کاتێک زیاتر چەسپاندنی گیانی تەبایی و یەک هەڵوێستی نێوماڵی کوردستانیمان لێ دەخوازێ، یەک ڕێزی لایەنە سیاسیەکانی کوردستان دەستەبەری پاراستنی دەستکەوتەکانی گەلی کوردستانە.
ئێمە كاتێك یادی دامەزراندنی پارتەكەتان پیرۆز دەكەین، ئومێدەوارین بە هەموو لایەك دڵسۆزانە و بەرپرسانە ھەوڵی چارەسەرکردنی كێشە و گیروگرفتەکان بدەین و دواڕۆژێكی ئاسوودە و بەختەوەر بۆ رۆڵەكانی گەلەكەمان دەستبەر بكەین.
جارێكی دیكە پیرۆزباییتان لێدەكەین و هەر سەرفراز و سەركەوتوو بن....
مەكتەبی سیاسی
پارتی دیموكراتی كوردستان
کۆمێنت (0)
تا ئێستا هیچ کۆمێنتێک نەکراوە.