ڤلادیمیر پوتین، سه‌رۆكی رووسیا، له میانی په‌یوه‌ندییه‌كی ته‌له‌فۆنییدا پیرۆزبایی له جۆ بایدن ،سه‌رۆكی ئه‌مریكا كرد.
له راگه‌یا‌ندراوێكدا كه له‌لایه‌ن كۆشكی كرملینه‌وه بڵاوكراوه‌ته‌وه، ناوه‌ڕۆكی په‌یوه‌ندییه ته‌له‌فۆنییه‌كه‌ی نێوان ڤلادیمیر پوتین و جۆ بایدن بڵاوكراوه‌ته‌وه.
له راگه‌یا‌ندراوه‌كه‌دا هاتووه: "پوتین پیرۆزبایی له بایدن كرد به‌بۆنه‌ی ده‌ستبه‌كاربوونی وه‌ك سه‌رۆكی ئه‌مریكا. پوتین ئاماژه‌ی به‌وه‌كرد ئاساییكردنه‌وه‌ی په‌یوه‌ندییه‌كانی نێوان ئه‌مریكا و رووسیا له به‌رژه‌وه‌ندیی هه‌ردوو وڵات و به‌له‌به‌رچاوگرتنی به‌رپرسیارێتیی تایبه‌تیی ئه‌و وڵاتانه له ده‌سته‌به‌ركردنی ئاسایش و سه‌قامگیریی گه‌ردوونی، له به‌رژه‌وه‌ندیی سه‌رجه‌م جیهانه".
له به‌شێكی دیكه‌ی راگه‌یا‌ندراوه‌كه‌دا باس له‌وه‌كراوه، له میانی په‌یوه‌ندییه ته‌له‌فۆنییه‌كه‌دا راوێژ له‌باره‌ی بابه‌ته‌كانی په‌یوه‌ست به درێژكردنه‌وه‌ی رێككه‌وتننامه‌ی نوێی كه‌مكردنه‌وه‌ی چه‌كه ستراتیژییه‌كان كراوه و تێیدا هاتووه: "له‌ماوه‌ی چه‌ند رۆژی داهاتوودا لایه‌نه‌كان، له‌پێناو ده‌سته‌به‌ركردنی كاركردنی باشتری میكانیزمی گرنگی یاسایی نێوده‌وڵه‌تیی سه‌باره‌ت به سنوورداركردنی جبه‌خانه‌ی مووشه‌كه ناوه‌كییه‌كان، سه‌رجه‌م رێكاره‌كان ته‌واوده‌كه‌ن".
كۆشكی كرملین تیشكی خستووه‌ته سه‌ر ئه‌وه‌ش كه پوتین و بایدن تاوتوێی په‌تای ڤایرۆسی كۆرۆنا و په‌یوه‌ندییه ئابوورییه‌كانیشیان كردووه و له راگه‌یا‌ندراوه‌كه‌دا هاتووه: "له‌نێو ئه‌و پرسه نێوده‌وڵه‌تییانه‌ی كه باسكران، كشانه‌وه‌ی یه‌كلایه‌نه‌ی ئه‌مریكا له په‌یماننامه‌ی ئاسمانی كراوه، گرفتی پارێزگارییكردن له رێككه‌وتننامه‌ی ئه‌تۆمیی له‌گه‌ڵ ئێران، چاره‌سه‌ری قه‌یرانی ئۆكراینا و هه‌وڵی رووسیا بۆ ئه‌نجامدانی لووتكه‌ی ئه‌نجوومه‌نی ئاسایشی نه‌ته‌وه‌یه‌كگرتووه‌كان له‌سه‌ر ئاستی ئه‌ندامانی، هه‌بوون".
کۆمێنت (0)
تا ئێستا هیچ کۆمێنتێک نەکراوە.