ئێران ... فه‌رمانی له‌سێداره‌دان به‌سه‌ر هاووڵاتییه‌کی کوردا جێبه‌جێ کرا

به‌ره‌به‌یانی ئه‌مڕۆ، فه‌رمانی له‌سێداره‌دان بۆ به‌ندكراوێكی سه‌وڵاوای رۆژهه‌ڵاتی كوردستان، به‌ تۆمه‌تی كوشتنی به‌ئه‌نقه‌ست، له‌ به‌ندیخانه‌ی سنه‌ جێبه‌جێ كرا.

ڕێكخراوی هه‌نگاو بۆ مافه‌كانی مرۆڤ، بڵاوی كرده‌وه‌، كه‌ به‌ره‌به‌یانیی ئه‌مڕۆ چوارشه‌ممه‌ 30/12/2020، حوكمی له‌سێداره‌دان بۆ مسته‌فا سه‌یفی، ته‌مه‌ن 28 ساڵان، كه‌ خه‌ڵكی گوندی وێژنانی سه‌وڵاوایه‌، له‌ به‌ندیخانه‌ی ناوه‌ندیی سنه‌ جێبه‌جێ كراوه‌.

هه‌نگاو ڕاشیگه‌یاندووه‌ ، عه‌تا سه‌یفی، باوكی مسته‌فا، هه‌واڵه‌كه‌ی پشتڕاست كردووه‌ته‌وه‌ و ئاشكرای كردووه‌ كه‌ بنه‌ماڵه‌ی كوژراوه‌كه‌ ئاماده‌ نه‌بوونه‌ له‌ كوڕه‌كه‌ی خۆش بن و داوای بڕه‌پاره‌یه‌كی زۆریان بۆ لێخۆشبوون كردووه‌، ئه‌وانیش ئه‌و بڕه‌یان پێ دابین نه‌كراوه‌.

ئاماژه‌ بۆ ئه‌وه‌ش ده‌كات ، كه‌پێشتریش مسته‌فا سه‌یفی بۆ ژووری تاكه‌كه‌سی گواسترابووه‌وه‌ تا فه‌رمانی له‌سێداره‌دانی به‌سه‌ردا جێبه‌جێ بكرێ، به‌ڵام ماڵباتی كوژرراوه‌كه‌ له‌ به‌رامبه‌ر دابینكردنی 3 ملیار تمه‌ن بۆ سێ مانگ مۆڵه‌تیان به‌ بنه‌ماڵه‌كه‌ی دابوو.

له‌كۆتاییدا ، ڕێكخراوه‌كه‌ ڕایده‌گه‌ێنێت ، مسته‌فا سه‌یفی، له‌ 25/4/2015، به‌ هۆی كێشه‌یه‌كی كۆمه‌ڵایه‌تییه‌وه‌، كه‌سێك له‌ نزیكانی خۆی كوشتبوو و به‌و هۆیه‌وه‌ فه‌رمانی له‌سێداره‌دانی به‌سه‌ردا جێبه‌جێ كرا.