ئێران رایده‌گه‌یه‌نێت، ئه‌گه‌ر وڵاتانی ئه‌ورووپا له به‌رامبه‌ر ئه‌و نه‌وته‌ی كه به هۆی سزاكانی ئه‌مریكاوه نه‌یتوانیوه بیفرۆشێت، بڕی 15 ملیار دۆلاری پێ بده‌ن، ئه‌وا به‌ڵێنه‌كانی رێككه‌وتنی ئه‌تۆمییان به‌بێ كه‌موكوڕی به‌جێهێناوه..
ئاژانسی هه‌واڵیی فارس بڵاویكرده‌وه، جێگری وه‌زیری ده‌ره‌وه‌ی ئێران، عه‌باس عراقچی رایگه‌یاندووه كه بۆ جێبه‌جێكردنی رێككه‌وتنی ئه‌تۆمی، یان ده‌بێت بوار بڕه‌خسێنن ئێران نه‌وتی خۆی بفرۆشێت، یان قه‌رزی پێ بده‌ن.
عه‌باس عراقچی راشیگه‌یاندووه، به‌پێچه‌وانه‌وه ئێران به‌رده‌وام ده‌بێت له كه‌مكردنه‌وه‌ی به‌ڵێنه‌كانی رێككه‌وتنه‌كه و گوتوویه‌تی "جێبه‌جێكردنی رێككه‌وتنی ئه‌تۆمی به‌نده به دابینكردنی بڕی 15 ملیار دۆلار له میانی چوار مانگدا. ئه‌ورووپا یان ده‌بێت نه‌وت له ئێران بكڕێت، یان ده‌بێت هێنده‌ی داهاتی نه‌وت قه‌رزمان پێ بدات."
کۆمێنت (0)
تا ئێستا هیچ کۆمێنتێک نەکراوە.