ئه‌حمه‌د ئه‌لجبوری، ئه‌ندامی په‌رله‌مانی عێراق به‌ده‌نگی ئه‌مریكای رایگه‌یاندووه: سه‌د ڕۆژ به‌سه‌ر پێكهێنانی حكومه‌تی عێراقدا تێپه‌ڕ ده‌بێت، به‌ڵام هێشتا دیاریكردنی وه‌زیره‌كان بۆ چوار پۆستی گرنگ له‌م حكومه‌ته‌دا ته‌واو نه‌كراون، واته وه‌زیری به‌رگری و ناوخۆ و داد و هه‌روه‌هاش په‌روه‌رده.
ده‌شڵێت: له‌م دۆسێیه‌یاندا په‌رله‌مانی وڵاته‌كه‌ش به‌رپرسیارێتی ده‌كه‌وێته ئه‌ستۆ چونكه ناكۆكییه سیاسییه‌كان و نه‌بوونی متمانه وه‌هایان كردووه، په‌رله‌مانتاران نه‌توانن ده‌نگی یه‌كلاكه‌ره‌وه بده‌ن به‌و كاندیدانه‌ی كه سه‌ره‌ك وه‌زیر ناوه‌كانیانی ناردبوو بۆ په‌رله‌مان.
ئه‌لجبوری ئاماژه‌ش به كه‌مته‌رخه‌می و كه‌موكوڕی له دۆسێكانی تایبه‌ت به ڕه‌وشی ئاسایشی ده‌كات و ده‌ڵێت : هێشتاش له عێراق ده‌سته و تاقمی وه‌ها هه‌ن خۆیان له سه‌رو یاساوه ده‌بینن و هه‌وڵی ده‌ستبه‌سه‌رداگرتنی دامه‌زراوه ده‌سه‌ڵاتداره‌كانی ده‌وڵه‌ت ده‌ده‌ن و ده‌شڵێت بێ له‌وه‌ش "گه‌ڕانه‌وه‌یه‌كی ئاشكرایانه‌ی چه‌ته‌كانی داعش ده‌بینرێت له ڕێی ئه‌و هێرشانه‌ی ده‌یكه‌نه سه‌ر گونده‌كان و كوشتنی خه‌ڵكی بێتاوان، وه‌ك ئه‌و هێرشانه‌ی له ڕۆژئاوای موسڵ و باكوری پارێزگای سه‌ڵاحه‌دیندا ده‌كرێن.
کۆمێنت (0)
تا ئێستا هیچ کۆمێنتێک نەکراوە.