رۆمانی " وردوخاشی پەرتەوازە " لە نوێترین کاری وەرگێڕانی " ڕەنجدەر جەبار" ه كه له ناوەندی ڕەهەند لە شاری سلێمانی چاپ و بڵاوی دەکاتەوە .
ئەم ڕۆمانە له لایه‌ن " موحسین ئەلڕەملی " ه‌وه نووسراوه كه چیرۆکی خێزانێک دەگێڕێتەوە لە کۆمەڵێک کەسایەتی جۆراوجۆر پێکهاتوون وەک نموونەیەکی بچووکراوەی پێکهاتە ئیتنی و کۆمەڵایەتییەکانی عێراق.
باوکێکی نیشتیمانپەروەر تا ئەندازەی پەرستنی نیشتیمان لەگەڵ دایکێکی خۆڕاگر و قوربانیدەر. کوڕە گەورەکەیان، کە بەلەدایکبوونی مژدەی سەلامەتی و پیاوەتی باوکی بە خەڵکی ئاوایی ڕاگەیاند دەبێتە کەسایەتییەکی وێنەکێش و دەستڕەنگین. ئەم کوڕە هونەرەکەی و دەست ڕەنگینیەکەی دەخاتە خزمەت هاوگوندییەکانی و کەسوکارەکەیەوە.
هەرچەندە ئەم کوڕە وێنەی هەموو شتێک و هەموو کەسێکی ئاواییەکەی دەکێشێت بە جۆرێک حەوت سەد جار وێنەی خوشکە شەنگەکەی دەکێشێت، کە دواهەمینیان شەوی پێش لەسێدارەدانی بوو، بەڵام نەیتوانی وێنەی تەنها دوو کەس بکێشێت، مەحمودی برای و سەرۆک. مەحمود لەبەر ئەوەی هیچ شتێکی تێدا بەدی نەدەکرد شایەنی وێنەکێشان بێت .
سەرۆک لەبەر ئەوەی هێندە ڕقی لێبوو نەیدەتوانی وێنەی بکێشێت. چیرۆکی ئەم نیگارکێشە، نموونەیەکە بۆ نیگارکێشێکی ڕاستەقینە کە ڕاستگۆیی و حەقبێژی ئاوێتەی هونەرەکەی دەکات، هەر ڕۆمانەکەدا خوێنەر بەر چەندین چیرۆکی دیکە.
پێشتر دوو رۆمانی هەمان نووسەر بە کوردی بڵاوکراونەتەوە کە یەکەمیان " خۆشیەویستی دێڵەگورگ و کتێب "، کە شێرزاد هەینی کردوویەتی بە کوردی، هاوکات ڕۆمانی "باخچەکانی سەرۆک"یش، کە ڕەنجدەر جەبار وەریگێڕاوە.
کۆمێنت (0)
تا ئێستا هیچ کۆمێنتێک نەکراوە.