به‌پێی هه‌واڵێكی هه‌ژماری فه‌رمی راگه‌یاندنی پێشمه‌رگه له تۆری كۆمه‌ڵایه‌تی فه‌یسبووك ، ئه‌مرِۆ ٥/١٢/٢٠١٨ سه‌ربه‌ست له‌زگین ، بریكاری وه‌زاره‌تی پێشمه‌رگه به یاوه‌ری فه‌ریق جه‌مال محمد سه‌رۆكی ئه‌ركان و لیوا سالار جه‌باری راوێژكاری وه‌زاره‌ت و كۆلۆنێل فۆن بلومروده‌ر فه‌رمانده‌ی گشتی هێزه‌كانی ئه‌ڵمانیا له عێراق ، نه‌خۆشخانه‌ی پێشمه‌رگه‌یان به‌سه‌ر كرده‌وه كه له قۆناغی كۆتایی كاره‌كانیدایه.
دوای به‌سه‌ركردنه‌وه‌ی به‌ش و یه‌كه جیاوازه‌كانی نه‌خۆشخانه‌كه بۆ لێپرسینه‌وه له چۆنیه‌تی به‌رێوه‌چوونی كاره‌كان كۆبوونه‌وه‌یه‌كی هاوبه‌شیان له‌گه‌ل كۆلۆنێل ڤۆن بلومروده‌ر فه‌رمانده‌ی گشتی هێزه‌كانی ئه‌ڵمانیا له عێراق و ستافی راوێژكارانی سوپای ئه‌ڵمانیا له هه‌رێمی كوردستان ئه‌نجامدا.
له‌و كۆبوونه‌وه‌یه‌دا بریكاری وه‌زاره‌تی پێشمه‌رگه سوپاسی هه‌وڵ و خه‌مخۆری فه‌رمانده و تیمه راوێژكاره‌كانی سوپای ئه‌ڵمانیای كرد كه به خه‌مخۆریه‌وه و به‌رده‌وام له پشت به ئه‌نجام گه‌یاندنی دروست كردنی نه‌خۆشخانه‌ی پێشمه‌گه‌وه بوون و به‌رده‌وام چاودێری پرۆسه‌ی دروست كردن و ته‌واوكردنی پرۆژه‌كه بوون هه‌روه‌ها ته‌ئكیدی كرده‌وه كه پێویسته كۆمپانیای جێبه‌جێكار له‌سه‌ر به‌ڵێنی خۆی سوور بێت و پرۆژه‌كه له كاتی دیاریكراودا به‌كۆتا بگه‌یه‌نێت، دواتر فه‌رمانده‌ی هێزه‌كانی ئه‌ڵمانیا له عێراق را و سه‌رنجی تایبه‌تی خۆی سه‌باره‌ت به چۆنیه‌تی به‌رێوه‌چوونی كاره‌كانی پرۆژه‌كه به بریكاری وه‌زیری پێشمه‌رگه گه‌یاند و هیوای خواست كه بتوانرێت له واده و كاتی خۆیدا كۆتایی به ته‌واوی كاره‌كانی پرۆژه‌كه بێت و پێشمه‌رگه ببێته خاوه‌نی یه‌كه‌م نه‌خۆشخانه‌ی نموونه‌یی سه‌ربازی.
کۆمێنت (0)
تا ئێستا هیچ کۆمێنتێک نەکراوە.