به مه‌به‌ستی چاره‌سه‌كردن و پاراستنی ته‌ندروستی و سه‌لامه‌تی هاووڵاتییان، وه‌زاره‌تی ته‌ندروستی عێراق و هه‌رێمی كوردستان، یه‌كه‌مین كۆنفرانسی كۆنتڕۆڵكردنی هه‌وكردن له شاری هه‌ولێر به‌رێوه‌ده‌چێت.
ئامانج له كۆنفرانسه‌كه، كاركردنه له‌سه‌ر ھۆكاره‌كانی پیسبوون، كۆنترۆڵكردنی ھه‌وای پیس، رێگریكردن له گه‌شه‌كردنی میكرۆبه‌كان به مه‌به‌ستی ته‌ندروستییه‌كی سه‌لامه‌ت.
سامان به‌رزنجی ، به‌ڕێوه‌به‌ری گشتی ته‌ندروستی ھه‌ولێر، له گوتارێكدا له میانی كۆنفرانسه‌كه‌دا ئاماژه‌ی به‌وه‌كرد كه كۆنترۆڵكردنی پیسبوون له كوردستان، به‌رنامه‌ی چه‌ند ساڵه‌ی وه‌زاره‌تی ته‌ندروستی ھه‌رێمی كوردستانه و ئه‌م فاكته‌ره گرنگی به‌رچاوی ھه‌یه بۆ متمانه و سه‌ركه‌وتنی پرۆسه‌كانی پزیشكی به‌تایبه‌تی دوای نه‌شته‌رگه‌ری و قۆناغه‌كانی دیكه، ھه‌روه‌ھا جه‌ختی له‌وه‌شكرده‌وه كه پیسبوون بۆ ھاووڵاتییانیش كێشه‌یه‌كی گه‌وره‌یه، بۆیه ماوه‌یه‌ك وه‌زاره‌تی ته‌ندروستی ھه‌رێمی كوردستان كاری له‌سه‌ركردووه.
ناوبراوه باسی له‌وه‌شكرد كه له نه‌خۆشخانه فێركاری و گشتییه‌كاندا پرۆسه‌ی پاكسازی به‌ڕێوه‌چووه و ژماره‌یه‌ك له پزیشكان و كارمه‌ندانی ته‌ندروستی كاریان له‌سه‌ركردووه و ئێستا كارمه‌ندانی دیكه‌ی بواری پیشه‌یی و ئه‌ندازه‌یی و میكانیكی كاری له‌سه‌ر ده‌كه‌ن جه‌ختیشیكردووه كه ئه‌مه ده‌بێته ھۆی په‌ره‌پێدانی باشتركردنی ته‌ندروستی ھاووڵاتییان.
كۆنفرانسی كۆنترۆڵكردنی ھه‌وكردن به ھاوبه‌شی له نێوان ھه‌رێمی كوردستان و وه‌زاره‌تی ته‌ندروستی عێراقی به‌ڕێوه‌ده‌چێت و بڕیاره له‌م كۆنفرانسه چوار توێژینه‌وه‌ی بواره‌كانی ھۆكاره‌كانی پیسبوون، كۆنترۆڵكردنی ھه‌وای پیس، رێگریكردن له گه‌شه‌كردنی میكرۆبه‌كان و په‌ره‌پێدانی پاكگوزاری پێشكه‌ش بكرێن و ھه‌ریه‌ك له به‌ڕێوه‌به‌رایه‌تی گشتی ته‌ندروستی ھه‌ولێر و وه‌زاره‌تی ته‌ندروستی عێراق به ھاوبه‌شی كاری له‌سه‌ر بكه‌ن.
کۆمێنت (0)
تا ئێستا هیچ کۆمێنتێک نەکراوە.