ئه‌مرۆ سێشه‌ممه 4 ى 12 ى 2018 ، پشتیوان سادق وه‌زیری ئه‌وقاف و كاروباری ئاینی به‌وه‌كاله‌ت له‌میانى به‌شداری كردنى لە رێوڕەسمی دەرچووانی پەیمانگای کوردستان له‌لێدوانى بۆ ده‌زگاكانى ڕاگه‌یاندن له‌باره‌ى پاشه‌كه‌وتی مووچه‌ی فه‌رمانبه‌رانی هه‌رێمى كوردستان ڕایگه‌یاند: لەنزیكترین كاتدا پاشەكەوتی موچە نامێنێت، لەئێستاشدا لەگەڵ بەغدا گفتوگۆیەكی چڕ هەیە كە هەناردەی نەوتی كەركوك لەڕێگەی بۆری هەرێمی كوردستان بۆ توركیا دەستپێبكاتەوە.
ڕاشیگه‌یاند: وەزارەتی دارایی عیراق و هەرێم لەسەرهێلن بۆ ئەوەی بڕە پارەیەك بخەنەسەر ئەو بودجەیەی مانگانە بۆ هەرێمی كوردستان ڕەوانە دەكرێت ، له‌گه‌ڵ زیادكردنی ئەو بڕه پارەیەش وادەكات كە پاشەكەوت نەمێنێت، بەڵام بەدڵنیاییەوە 100% پاشەكەوتی موچە نامێنێت، كاتەكەشی پەیوەستە بەتەواوكردنی كابینەی نوێی حكومەتی عادل عه‌بدولمه‌هدی.
پشتیوان سادق ڕاشیگه‌یاند: كە باری دارایی هەرێمی كوردستان باشتر دەبێت، له‌گه‌ل ده‌ست به‌كاربوونى كابینه‌ى نوێى حكومەتی هه‌رێم ، بەرنامەو كارنامەی تایبەت و باش دەبێت كه‌له‌به‌رژه‌وه‌ندی خه‌ڵكى كوردستان ده‌بێت له‌پێناو ژیانێكى باشتر بۆیان.
کۆمێنت (0)
تا ئێستا هیچ کۆمێنتێک نەکراوە.