ئەنجوومەنی سەرکردایەتیی پارتی دیموکراتی کوردستان له كۆبوونه‌وه‌ی ئه‌مڕۆیدا پێشنیاری كرد كه مه‌سرور بارزانی بۆ پۆستی سه‌رۆكی حكوومه‌تی هه‌رێمی كوردستان دیاری بكرێت و نێچیرڤان بارزانیش بۆ سه‌رۆكی هه‌رێمی كوردستان.
ئه‌مڕۆ دووشه‌ممه 3-12-2018 به سه‌رپه‌رشتی سه‌رۆك بارزانی ئه‌نجوومه‌نی سه‌ركردایه‌تی پارتی دیموكراتی كوردستان كۆبووه‌وه و دوای کۆتاییهاتنی کۆبوونەوه‌كه‌ش مەحموود محەمەد، وتەبێژی فەرمیی پارتی له كۆنگره‌یه‌كی رۆژنامه‌وانیدا رایگه‌یاند: خه‌ڵكی كوردستان ده‌یه‌وێت داموده‌زگاكان كه یه‌كیان نه‌گرتۆته‌وه یه‌كبگرنه‌وه و ئێمه وه‌ك پارتی دیموكراتی كوردستان دروشممان كوردستانێكی به‌هێزه.
وتەبێژی فەرمیی پارتی دیموكراتی كوردستان راشیگه‌یاند: پێداگیرین له‌سه‌ر چاككردنه‌وه‌ی بژێوی ژیانی خه‌ڵك.
مەحموود محەمەد وتیشی: لە کۆبوونەوەی سەرکردایەتیی پارتی پێشنیار كراوه كه مه‌سرور بارزانی بۆ پۆستی سه‌رۆكی حكوومه‌تی هه‌رێمی كوردستان و نێچیرڤان بارزانی بۆ سه‌رۆكی هه‌رێمی كوردستان دیاری بكرێن و پێشنیاره‌كه‌ش له كۆبوونه‌وه‌كه‌دا په‌سه‌ندكراوه.
هه‌ر له كۆبوونه‌وه‌كه‌دا دڵشاد شه‌هاب وه‌ك لیژنه‌ی دانوستانكاری پارتی ده‌ستنیشانكراوه.
هه‌روه‌ها مەحموود محەمەد راشیگه‌یاند: له داهاتوودا پرسی پێكهێنانی كابینه‌ی نوێی حكومه‌تی هه‌رێم تاوتوێ ده‌كه‌ین و لێژنه‌مان پێكهێناوه له‌گه‌ڵ لایه‌نه‌كان كۆببینه‌وه و هه‌موو لایه‌نه‌كان ئاماده‌ن له‌م قۆناغه‌دا به‌یه‌كه‌وه كاربكرێت.
کۆمێنت (0)
تا ئێستا هیچ کۆمێنتێک نەکراوە.