ساڵانه له ١٢ی مانگی ره‌بیعولئه‌وه‌ل و له پێشوازی یادی له‌دایكبوونی پێغه‌مبه‌ری ئیسلام، محه‌مه‌د، دروودی خوای لێبێت، له‌سه‌رتاسه‌ری جیھانی ئیسلامی، رێوڕه‌سمی خوێندنه‌وه‌ی مه‌ولود و مه‌ڕاسیمی تایبه‌ت و به‌خشینه‌وه‌ی شیرینی و سازدانی ئاھه‌نگی خۆشی به‌ڕێوه‌ده‌چێت و له لایه‌ن زۆرینه‌ی ده‌وڵه‌تانیشه‌وه ئه‌و رۆژه ده‌كرێته پشووی فه‌رمیی.
ئه‌م بۆنه‌یه له مزگه‌وت و ته‌كیه و شوێنه جیاجیاكان به‌ڕێوه‌ده‌چێت و له به‌شێكی رێوڕه‌سمه‌كه‌شدا رێبازانی ته‌ریقه‌ته‌كان دوای خواردنی شیرینی و پیرۆزبایی و یه‌كترماچكردن، ئه‌وا ده‌ست ده‌كه‌ن به زیكركردن و تا ماوه‌یه‌كی زۆر به‌رده‌وام ده‌بن.
ئه‌مساڵیش وه‌ك هه‌میشه له‌م رۆژه‌دا موسڵمانان له‌به‌ره‌به‌یانییه‌وه ده‌ستیانكردووه به دابه‌شكردنی شیرینی و رێوڕه‌سمی تایبه‌ت.
وه‌ك ساڵانی پێشوو، ئه‌مساڵیش به بۆنه‌ی جه‌ژنی له‌دایكبوونی پێغه‌مبه‌ری ئیسلام، محه‌مه‌د دروودی خوای له‌سه‌ربێت، له‌سه‌رجه‌م داموده‌زگاكانی حكوومه‌تی ھه‌رێمی كوردستان كرایه پشووی فه‌رمیی.
سه‌ره‌تای یادكردنه‌وه و به‌ڕێوه‌چوونی مه‌ولودی پێغه‌مبه‌ر، وه‌ك نه‌ریتێك و رێزلێنان له پێغه‌مبه‌ری خوا، ده‌گه‌ڕێته‌وه بۆ نزیكه‌ی ٨٠٠ ساڵ له‌مه‌وبه‌ر و سه‌رده‌می ده‌سه‌ڵاتی حاكمی شاری ھه‌ولێر، مزه‌فه‌ره‌ددین كه‌وكه‌به‌ری.
کۆمێنت (0)
تا ئێستا هیچ کۆمێنتێک نەکراوە.