هەڵمەتی بەرەنگاربوونەوەی توندوتیژی دژی ئافرەتان لە 25ی نۆڤەمبەر دەستپێدەکات

شاندێکی کونسوڵخانەی ئەمریکا لە هەولێر، سەردانی ئەنجومەنی باڵای کاروباری خانمانی کوردستانی کرد، رۆڵی ئەو ئەنجومەنەی بەرز نرخاند.

ئەنجومەنی باڵای کاروباری خانمانی کوردستان، لە راگەیاندراوێکدا، ئاماژە بەوە دەدات، کە ئه‌مرۆ چوارشەممە 17/10/2018 فلۆرین گۆرگیس سێودین بەڕێوەبەری گشتی دیوان لە ئەنجومەنی باڵای كاروباری خانمان، بە ئامادەبوونی بەڕێوەبەری راگەیاندن و پەیوەندییەكان، پێشوازی لە شاندێكی كونسوڵخانەی گشتی ئەمریكا لە هەرێمی كوردستان كرد، کە شاندەکە پێکهاتبوو، لە هێسەر فابریكانت، بەرپرسی كاروباری گشتی،  ڕەش مار بێرگ، جێگری بەرپرسی كاروباری گشتی و سالار جاف بەڕێوەبەری بەشی سوشیاڵ میدیا.

ئەنجومەنی باڵای کاروباری خانمانی کوردستان، ئەوەشی خستووەتەڕوو، کە لەكۆبوونەوەیەكی هاوبەشدا فلۆرین گۆرگیس، شاندی ئەمریكای بەگرنگترین كاروچالاكییەكانی ئەنجومەنی باڵای خانمان ئاشنا كرد، بەتایبەتی پلانە ستراتیژییەكانی ئەنجومەن لە بواری نەهێشتنی توندوتیژیی و گەشەپێدانی ژنان و بوارەكانی تواناسازی ئافرەتان، لە هەموو سێكتەرەكاندا، هەروەها چەندین پرسی تری پەیوەست بە رەوشی ژنان لە هەرێمی كوردستاندا، لەگەڵ شاندی میوان خرانە بەرباس.

هەر لە دیدارەكەدا بیروڕا ئاڵوگۆڕكرا بۆ ئەنجامدانی چالاكی و پرۆژەی هاوبەش، لەو پرسانەی پەیوەندیان بە گەشەپێدانی رەوشی ژنانەوە هەیە، هەروەها چالاكییەكانی هەڵمەتی نیشتمانی بەرەنگاربوونەوەی توندوتیژی دژی ئافرەتان كە لە 25ی نۆڤەمبەری داهاتوو دەست پێدەكات و ماوەی 16 رۆژ دەخایەنێت خرانە بەرباس.

شاندی كونسوڵخانەی ئەمریكا رۆڵی ئەنجومەنی باڵای كاروباری خانمانی لە حكوومەتی هەرێمی كوردستان بەزرنرخاند، لە بوارەكانی گەشەپێدانی رەوشی ئافرەتان لە هەرێمی كوردستاندا.