وەزارەتی کارەبای حکوومەتی هەرێمی کوردستان، ڕوونکردنەوەیەکی سەبارەت بە بەرنامەی پێدانی کارەبا بڵاو کردەوە.
وەزارەتی کارەبا سەبارەت بە بەرنامەی پێدانی کارەبار ڕوونکردنەوەیەکی بڵاو کردووەتەوە و تێیدا هاتووە، "وەزارەتی كارەبا بەپێویستی دەزانێت روونكردنەوەیەك سەبارەت بەدۆخی كارەبا و ماوەكانی پێدانی كارەبای نیشتمانی لەم وەرزەدا بڵاوبكاتەوە، ئەمەش دوای ئەوەی لە مانگی ئەیلوولدا سەرەڕای سنووردارێتی سەرچاوەی دارایی و بەرزبوونەوەی پلەكانی گەرماو هەڵكشانی خواستی بەكارهێنانی كارەبا توانرا بە پشتبەستن بەبەرنامەیەكی تۆكمە بە تێكڕا 15 كاتژمێر كارەبا بدرێت و دواتریش بەهەماهەنگی لەگەڵ مۆلیدە ئەهلییەكان سەرجەم كاتژمێرەكانی كارەبا بۆهاووڵاتییان دابین بكرێت".
وەزارەتی کارەبا ڕوونیشی کردووەتەوە، "ئێستا ماوەكانی پێدانی كارەبا زیاد دەبێت هەروەكو پێشتر ئاماژەمان پێدابوو كە لەكۆتایی مانگی ئەیلوول و مانگی تشرینی یەكەم بەهۆی دابەزینی پلەكانی گەرماو كەمبوونەوەی خواست لەسەر بەكارهێنانی كارەبا دەتوانرێت ماوەكانی پێدانی كارەبا بۆ 19-21 كاتژمێر بەرزبكرێتەوە".
لە ڕوونکردنەوەکەدا وەزارەتی کارەبا هاووڵاتییان ئاگادار دەکاتەوە كە زیادبوون یاخود كەمبوونەوەی ماوەكانی پێدانی كارەبا هیچ پەیوەندی بە مەراسیم و بۆنەو یادەكانەوە نییە تاوەكو هەندێك كەناڵی راگەیاندن پروپاگەندەی وا بڵاوبكەنەوە كە گوایە بەهۆی بانگەشەی هەڵبژاردن و پرۆسەی دەنگدانەوە ماوەكانی پێدانی كارەبا زیادبووە، بۆ سەلماندنی ئەم راستیەش هەموو داتاكانی ساڵانی پێشوو دەریدەخەن كە لەم وەرزەدا خواست لەسەر بەكارهێنانی كارەبا دادەبەزێت و بەو هۆیەوە كاتەكانی پێدانی كارەبا زیاد دەبێت.
کۆمێنت (0)
تا ئێستا هیچ کۆمێنتێک نەکراوە.