ئه‌نجومه‌نی ئاسایشی نیشتیمانی عێراق تاوتوێی دۆخی ئه‌منی و خزمه‌تگوزارییه‌كانی شاری به‌سره‌ی كرد و پاراستنی گیانی هاوڵاتیانیشی خسته ئه‌ستۆی هێزه ئه‌منیه‌كان.
له به‌یاننامه‌یه‌كدا نوسینگه‌ی حه‌یده‌ر عه‌بادی بڵاویكرده‌وه، له كۆبوونه‌وه‌ی ئه‌نجومه‌نی ئاسایشی نیشتیمانی عێراق جه‌ختكراوه‌ته‌وه له مافی ئه‌نجامدانی خۆپیشاندانی ئاشتییانه‌ی هاووڵاتیان و ده‌وڵه‌ت سوره له‌سه‌ر پاراستنی گیانی هاوڵاتیان له‌لایه‌ن هێزه ئه‌منییه‌كانه‌وه.
له به‌شێكی به‌یاننامه‌كه‌ی نوسینگه‌ی حه‌یده‌ر عه‌بادیدا هاتووه نابێت ده‌ستدریژی بكرێته سه‌ر موڵك و ماڵی گشتی و تایبه‌ت، له هه‌مان كاتدا هه‌موو ئه‌و داوایانه‌ش ڕه‌تده‌كرێته‌وه كه داوای به‌كارهێنانی هێز ده‌كات له دژی خۆپیشانده‌ران.
ئه‌نجومه‌نی ئاسایشی نیشتیمانی عێراق له كۆبوونه‌وه‌كه‌دا دوورخستنه‌وه‌ی ململانێ سیاسییه‌كانی له بارودۆخی ئێستای به‌سره به گرنگ زانیوه، و دوایكردووه دۆسیه‌ی ئه‌منی بۆ ململانێی سیاسی به‌كارنه‌هێنرێت.
ماوه‌ی چه‌ند ڕۆژێكه خۆپیشاندانه‌كانی به‌سره به‌رده‌وامی هه‌یه و تائێستا 9 خۆپیشانده‌ر كوژراون و ده‌یانی دیكه‌ش بریندار بوون، له به‌رامبه‌ردا خۆپیشانده‌ران ده‌ستیانكردووه به سوتاندنی باره‌گا حزبی و حكومییه‌كان و سه‌قفی داواكاریه‌كانیان به‌رزكردوه‌ته‌وه.
کۆمێنت (0)
تا ئێستا هیچ کۆمێنتێک نەکراوە.