ڕاوێژكاری پارێزگاری نه‌ینه‌وا بۆ كاروباری ئێزدییه‌كان خده‌یدا ئه‌لداوی حكومه‌تی ناوه‌ندی تاوانبار كرد به پشتگوێخستنی دۆسیه‌ی ئێزدییه‌كان و جه‌ختیشی له‌وه‌كرده‌وه كه شه‌نگال به كه‌ڵكی ژیان نایه‌ت به‌هۆی وێرانبوون و نه‌بوونی هیچ جۆره خزمه‌تگوزارییه‌ك.
ناوبراو له چواره‌مین ساڵیادی داگیركردن و جینۆسایدی هاووڵاتیانی شه‌نگال كه تیرۆریستانی داعش ده‌رهه‌ق به هاووڵاتیانی بێتاوان ئه‌نجامیاندا گوتی حكومه‌تی عێراق كه‌مته‌رخه‌مه به‌رامبه‌ریان و ده‌ستی هاوكاری بۆ درێژ نه‌كردوون و ته‌نانه‌ت بیریشیان لێ ناكاته‌وه.
هه‌روه‌ها ئه‌لداوی ئاماژه‌ی به‌وه‌شكرد تاوه‌كو ئێستا چاره‌نووسی سه‌دان ژن و كچی ئێزدییه‌كان كه له‌لایه‌ن داعشه‌وه ڕفێندراوون نادیاره و حكومه‌تیش هیچ هه‌نگاوێكی نه‌ناوه بۆ به‌دواداچوون.
گوتیشی قه‌ره‌بووی ئه‌و خێزانانه‌شی نه‌كردۆته‌وه كه دووچاری كوشتن و برینداربوون و ڕفاندن بوونه‌ته‌وه له‌لایه‌ن ئه‌و ڕێكخراوه تیرۆریستییه‌وه و هاووڵاتیانی ئه‌و شاره‌ش به‌هۆی ڕووخانی خانووه‌كانیان تاوه‌كو ئێستا له‌ناو خێوه‌تا ده‌ژین.
ڕاوێژكاری پارێزگای نه‌ینه‌وا گوتیشی له‌گه‌ڵ ئه‌وه‌ی دوو ساڵ به‌سه‌ر كۆنتڕۆڵكردنه‌وه‌ی شه‌نگال تێپه‌ڕیوه تاوه‌كو ئێستا جێگای ململانێیه و سه‌قامگیری و ئارامی تیایدا به‌رقه‌رار نییه.
کۆمێنت (0)
تا ئێستا هیچ کۆمێنتێک نەکراوە.