ئه‌شواق جاف په‌رله‌مانتاری فراكسیۆنی پارتی دیموكراتى كوردستان له په‌رله‌مانی عێراق رایگه‌یاند" به‌هۆی جێبه‌جێنه‌كردنی داواكارییه‌كانی كورد له پڕۆژه یاسای بودجه‌ی عێراق له‌لایه‌ن سه‌رۆك فراكسیۆنه كوردستانییه‌كانه‌وه پێشنیارێك ئاراسته‌ی سه‌رۆك كۆماری عێراق كراوه، سه‌باره‌ت به كشانه‌وه‌ی كورد له ته‌واوی پرۆسه‌ی سیاسی له عێراق و ئه‌مرۆش سه‌رجه‌م سه‌رۆك فراكسیۆنه كوردستانییه‌كان له به‌غدا له‌گه‌ڵ فوئاد مه‌عسوم سه‌رۆك كۆماری عێراق كۆده‌بنه‌وه".
دوێنێ فراكسیۆنه كوردستانییه‌كان دانیشتنی په‌رله‌مانی عێراقییان بایكۆت كرد كه تایبه‌ت بوو به ده‌نگدان له‌سه‌ر پڕۆژه یاسای بودجه‌ی عێراق و دوای په‌سه‌ندكردنی 12 مادده له پڕۆژه یاساكه به‌هۆی تێكچوونی ڕێژه‌ی یاسایی په‌رله‌مانتارانه‌وه كۆبوونه‌وه‌كه بۆ سبه‌ی شه‌ممه دواخرا.
ئه‌شواق جاف له‌باره‌ی هه‌ڵوێستی سه‌ركردایه‌تی سیاسی كورد له‌به‌رامبه‌ر ئه‌گه‌ری جێبه‌جێنه‌كردنی داواكاری كورد له پڕۆژه بودجه‌ی عێراق بۆ باسنیوز گوتی" گله‌ییمان له سه‌ركردایه‌تی سیاسی و به‌رپرسانی پارته كوردستانییه‌كان هه‌یه كه تاوه‌كو ئێستا كۆنه‌بوونه‌ته‌وه سه‌باره‌ت به‌و بابه‌ته گرنگ و چاره‌نووسسازه ، كه په‌یوه‌سته به ژیانی هاووڵاتیانی هه‌رێمی كوردستانه‌وه و پێویسته به‌زووترین كات به‌رپرسانی باڵای سه‌رجه‌م حزبه كوردستانییه‌كان كۆببنه‌وه و بڕیارێك بده‌ن و هه‌ڵوێست بنوێنن".
ئه‌و په‌رله‌مانتاره كورده داواشی كرد كه پارته سیاسییه كوردییه‌كان ناكۆكی و جیاوازی بیركردنه‌وه‌كه‌یان و بابه‌تی هه‌ڵبژاردنه‌كان به‌لاوه نێن و به‌جددی كار له‌سه‌ر پرسی به‌شی كورد له بودجه‌ی عێراق بكه‌ن.
کۆمێنت (0)
تا ئێستا هیچ کۆمێنتێک نەکراوە.