رۆژ دوای رۆژ ئاماژه‌كانی شه‌ڕ و پێكدادان له نێوان سوپای ئه‌مریكا و حه‌شدی شه‌عبی له ناو ئه‌و ناوچانه‌ی ئه‌مریكییه‌كانی لێیه له عێراق نزیك ده‌بێته‌وه.
دوای هاتنی داعش بۆ عێراق، ئه‌مریكا و هاوپه‌یمانان له رێی فڕۆكه‌ی جه‌نگی و راوێژكاری سه‌ربازی هاوكاری زۆری عێراقیان كرد له شه‌ڕی دژ به داعش، به‌ڵام ئه‌و شه‌ڕه هێنده‌ی دیكه رێگه‌ی بۆ ئێرانییه‌كان خۆش كرد و به فتوایه‌كی عه‌لی سیستانیش ده‌یان گرووپی میلیشیا دامه‌زرا كه شیعه‌ی عێراقن، به‌ڵام وه‌لائیان بۆ خامه‌نه‌یی و قاسم سلێمانی هه‌یه، به‌وه‌شه‌وه نه‌وه‌ستان، به‌رگێكی یاسایییان كرده‌به‌ر.
هه‌ڕه‌شه‌كانی میلیشیاكانی حه‌شد دژ به بوونی سوپای ئه‌مریكا له عێراق نوێ نین، له به‌رامبه‌ردا ئه‌مریكاش داوای كردووه ئه‌و میلیشیایانه سه‌ر به ئێرانن و ده‌بێت عێراق به جێ بهێڵن.
رۆژنامه‌ی (الاخبار)ی لوبنانی سه‌ر به حزبوڵای لبنانی باڵی سیاسی و سه‌ربازیی ئێران له لبنان، له ژماره‌ی ئه‌مڕۆیدا له راپۆرتێكدا نایشارێته‌وه ئه‌گه‌ر و ئاماژه‌كانی شه‌ڕ و پێكدادان له نێوان میلیشیاكانی حه‌شد سوپای ئه‌مریكا نزیكه له‌و ناوچانه‌ی سوپای ئه‌مریكا ی تێدایه به تایبه‌ت له رۆژهه‌ڵاتی فوڕات.
به‌پێی رۆژنامه‌كه ئه‌گه‌ره‌كانی سه‌رهه‌ڵدانی ئه‌و شه‌ڕه گه‌وره زۆر نزیكه، ئه‌مه‌ش دوای ره‌تكردنه‌وه‌ی كشانه‌وه‌ی حه‌شد له ئه‌نبار و مووسڵ، سه‌رهه‌ڵدانیشی ته‌نیا پێویستی به یه‌ك به‌ریه‌ككه‌وتنی بچووك هه‌یه تا بڵاو ببێته‌وه و هه‌موو ناوچه‌كان بگرێته‌وه.
سوهێل تاهیر : كوردستان تیڤی
کۆمێنت (0)
تا ئێستا هیچ کۆمێنتێک نەکراوە.