پەرلەمانى عێراق ئەمڕۆ لە دانیشتنێکى مشتومڕ ئامێزدا هەموارى دووەمى یاساى هەڵبژاردنەکانى پەسەندکرد، کە تێیدا گۆڕانکارى کرا لە ژمارەى کورسییەکانى پەرلەمان و بڕوانامەى کاندیدەکان بۆ هەڵبژاردنى پەرلەمان، یان ئەو بڕوانامەیان هەبێت کە هاوتاى ئامادەیین کە ئامادەیی بازرگانى و پیشەسازیش دەگرێتەوە، هەروەها خاوەن بڕوانامەکانى دبلۆم و دبلۆمى باڵاش دەتوانن خۆیان کاندید بکەن.
لای خۆشیه‌وه هومام حەمودى جێگرى یەکەمى سەرۆکى پەرلەمانى عێراق هەردوو فەرمانگەى پەرلەمان و ڕاگەیاندنى ڕاسپارد، لێکۆڵینەوە بکەن لە یاسایی بوونى دانیشتنى ئەمڕۆى پەرلەمان.
حەمودى لە ڕاگەیەنراوێکدا ڕایگەیاند، ژمارەیەک ئەندامى پەرلەمان ناڕەزایی خۆیان نیشانداوە لەبارەى یاسایی بوونى دانیشتنەکەى پەرلەمان و ئامادەبوونى رێژەى یاسایی ئەندامان.
ئاماژەى بەوەش کردووە، وەک ڕێزگرتن لە ڕێڕەوى پرۆسەى یاسادانان و پارێزگاریکردن لێی، داواى لێکۆڵینەوەى لە دانیشتنەکەى ئەمڕۆ کردووە، کە تێیدا دەنگدرا لەسەر هەموارى دووەمى یاساى هەڵبژاردنى پەرلەمانى عێراق.
ئەمڕۆ پەرلەمانی عێراق کۆبووەوە و تیایدا دەنگی دا بە هەمواری یاسای هەڵبژاردنی پەرلەمان و دواتر دانیشتنەکە هەڵگیرا بۆ ڕۆژی سێشەممە.
دواى دانیشتنەکە ژمارەیەک ئەندامى پەرلەمان ڕایانگەیاند کە ڕێژەى یاسایی ئەندامان بۆ بەڕێوەچوونى دانیشتنەکە تەواونەبووە.
کۆمێنت (0)
تا ئێستا هیچ کۆمێنتێک نەکراوە.