ئه‌مڕۆ دووشه‌ممه 5/2/2018 مه‌سروور بارزانی، راوێژكاری ئه‌نجوومه‌نی ئاسایشی هه‌رێمی كوردستان و سه‌رۆكی بۆردی دامه‌زرێنه‌ری ده‌زگای خێرخوازی بارزانی، دوای كۆنفڕانسی ساڵانه‌ی ده‌زگای خێرخوازی بارزانی له لێدوانێكی رۆژنامه‌وانیدا رایگه‌یاند: كه‌ركووك شارێكی داگیركراوه‌و پێشنیازی دابه‌شكردنی پۆسته‌كانی پارێزگاكه ره‌تده‌كه‌ینه‌وه.
ڕاوێژکاری ئەنجومەنی ئاسایشی هەرێمی کوردستان راشیگەیاند: تاوەکوو دۆخی کەرکووک ئاسایی نەکرێتەوە، دان بە سیستەمی بەڕێوەبردنی شارەکەدا نانێن و کەرکووک بە شارێکی داگیرکراو دەزانین.
دووپاتیشی کردەوە کە ئەو ناوچە کوردستانییانەی لە دەرەوەی ئیدارەی هەرێمی کوردستان دان، پێویستە مافی دەستوورییان جێبەجێ بکرێت و ڕەوشی ناوچەکان ئاسایی بکرێنەوە.
ڕاوێژکاری ئەنجومەنی ئاسایشی هەرێمی کوردستان لەبارەی هەڵبژاردنەکانی عێراق و پەسەندکردنی کەسێک بۆ پۆستی سەرۆک وەزیرانی عێراق، ئاماژەی بەوە کرد کە جارێ هەڵبژاردن لە عێراق نەکراوە و ئەم بابەتانە بۆ دوای هەڵبژاردن قسەی لەبارەوە دەکرێ.
ده‌رباره‌ی كێشه‌كانی نێوان هه‌رێمی كوردستان و به‌غدا مه‌سرور بارزانی گووتی: حكومه‌تی هه‌رێمی كوردستان ئاماده‌ی گفتوگۆیه و داوای جێبه‌جێكردنی مافه ده‌ستوورییه‌كانی كورد ده‌كه‌ین.
کۆمێنت (0)
تا ئێستا هیچ کۆمێنتێک نەکراوە.