شەوکەت بەربەهاری بەڕێوەبەری خاڵی سنووری پێشخابور دەنگۆی داخستنی خاڵی سنووری پێشخابور رەت دەکاتەوە و دەڵێ، ھیچ بنەمایەکی نییە، "یەک خولەکیش ئەو خاڵە سنوورییە دانەخراوە و بگرە جموجۆڵی بازرگانی زیادیشیکردووە".
(شەوکەت بەربەهاری) لە لێدوانێکی تایبەتیدا به ماڵپەڕی فەرمیی پارتی دیموکراتی کوردستانی رایگەیاندووه: "ئەو دەنگۆیانەی كه ده‌لێن گوایه خاڵی سنووری پێشخابور داخراوە دوورن لە راستییەوە و ھیچ بنەمایەکیان نییە، چونکە بۆ ماوەی یەک خولەکیش سنوور دانەخراوە و ھاتووچۆ و جموجۆڵی بارزگانی بەردەوامە".
(بەربەھاری) گوتیشی: "رۆژانە خەڵک لە رۆژئاوای کوردستان ھاتووچۆ دەکات و ھاوکاری مرۆیی بۆ رۆژئاوای کوردستان رەوانە دەکرێت، جموجوڵی بازرگانیش بەردەوامە".
بەڕێوەبەری خاڵی سنووری پێشخابور ده‌شڵێ: "جموجوڵی بازرگانی بە بەراورد لەگەڵ رابردوو زیادیشی کردووە، بە داخەوە ھەندێک میدیا لە خۆیانەوە هەواڵی ناڕاست بڵاو دەکەنەوە، بێ ئەوەی بگەڕێنەوە سەرچاوەکەی".
کۆمێنت (0)
تا ئێستا هیچ کۆمێنتێک نەکراوە.