ئه‌ندامێكی ئه‌نجوومه‌نی پارێزگای كه‌ركوك رایده‌گه‌ێنێ، كارتی زۆرمان هه‌یه به‌كاری بهێنین له دژی هه‌ر بڕیارێك كه بدرێت سه‌باره‌ت به پارێزگاكه‌مان و پێشمه‌رگه‌ش پۆًلیسی هاتوچۆ نییه ،ده‌ستی به‌رز بكاته‌وه بۆ فه‌رموو كردن له هێزه‌كانی عێراق.
مه‌حه‌مه‌د كه‌مال سالح، ئه‌ندامی ئه‌نجوومه‌نی پارێزگای كه‌ركوك ،به ماڵپه‌ری ده‌زگای سه‌ته‌لایتی كوردستانی رایگه‌یاند: په‌رله‌مان شه‌رعییه‌تی خۆی له ده‌ست داوه‌و و مه‌رام و خواستی خه‌ڵكانی شۆڤێنی په‌یره‌و ده‌كات و به په‌نجه‌ی شۆڤێنییه‌ت په‌رله‌مان ده‌ڕوات به‌ڕێوه.
گوتیشی: بڕینی بودجه، بڕینی قوتی خه‌ڵكی سیڤل و فه‌رمانبه‌رانه، كه كاته‌كانی خۆیان بۆ خزمه‌ت كردن ته‌رخان كردووه و له پای كاركردن مووچه‌یان پێ ده‌درێت و عێراق خێریان پێ ناكات.
راشیگه‌یاند: ئه‌م په‌رله‌مانه نوێنه‌رایه‌تی گروپێكی دیاری كراوی شۆڤێنی ده‌كات و نوێنه‌رایه‌تی عێراق و گه‌لانی ناوچه‌كه ناكات.
سه‌باره‌ت به هێنانی پۆلیسی ئیتیحادی بۆ كه‌ركوك ئه‌و ئه‌ندامه‌ی ئه‌نجوومه‌نی پارێزگای كه‌ركوك گوتی:كاتێ داعش له كه‌ركوك نزیك بوو، فرقه‌ی 12 و عه‌مه‌لیاتی دیجله له كه‌ركوك رایانكرد و چه‌كه‌كانی خۆشیان نه‌برد و هێزی پێشمه‌رگه به هانای كه‌ركوكه‌وه هات و به‌رگری له كه‌ركوك كرد. ئێستا هاتنی پۆلیسی ئیتیحادی ته‌نیا بیانوو گرتنه به هێزی پێشمه‌رگه‌و دروستكردنی پشێوییه له ناوچه‌كه .
جه‌ختیشیكرده‌وه ، من له‌و باوه‌ڕه‌دانیم عێراق كه هێشتا له شه‌ڕدایه له‌گه‌ڵ داعش ،ده‌رگایه‌كی تری شه‌ڕ بكاته‌وه، به‌ڵام بێ گومان هێزی پێشمه‌رگه‌ی كوردستان ڕێگره له هه‌ر جووڵه‌یه‌كی سه‌ربازی بۆ كه‌ركوك و پێشمه‌رگه پوَلیسی هاتوچۆ نییه ،ده‌ستی به‌رز بكاته‌وه بۆ فه‌رموو كردن له هێزه‌كانی عێراق.
كوردستان تیڤی: رزگار تاهیر
کۆمێنت (0)
تا ئێستا هیچ کۆمێنتێک نەکراوە.