هێزە چەکدارەکانی ئوردن ڕایگەیاند، لە ماوەی چەند کاتژمێری ڕابردوودا شانشینی ئوردن ڕووبەڕووی پەلامارێکی مووشەکی بووەتەوە کە لە خاکی ئێرانەوە ئاراستە کرابوو و توانیویانە 18 مووشەکیی بالیستی تێکبشکێنن.
ئەمڕۆ چوارشەممە 9ـی ئەیلوول، هێزە چەکدارەکانی ئوردن لە ڕاگەیەندراوێکدا بڵاوی کردەوە، سیستەمەکانی بەرگریی ئاسمانی مامەڵەیان لەگەڵ 20 مووشەکی بالیستیدا کردووە کە بەرەو خاکی ئوردن هەڵدرابوون و لە خاکی ئێرانەوە ئاراستە کرابوون. هاوکات ڕوونی کردەوە، بەرگرییە ئاسمانییەکان توانیویانە بە سەرکەوتوویی 18 مووشەک تێکبشکێنن و لەناویان ببەن.
هەروەها ئەوەشی خستەڕوو، دوو مووشەک لە ناوچەی چۆڵ و دوور لە ئاوەدانی کەوتوونەتە خوارەوە، ئاماژەی بەوەش کرد کە پڕۆسەکانی چاودێریکردن، بەدواداچوون و هەڵسەنگاندن تا ئێستاش بەردەوامن.
هێزە چەکدارەکانی ئوردن بەپێی هەڵسەنگاندنە مەیدانییەکان جەختی لەوە کردەوە کە هیچ زیانێکی گیانی بەهۆی ئەو دەستدرێژییە مووشەکییەوە تۆمار نەکراوە.
کۆمێنت (0)
تا ئێستا هیچ کۆمێنتێک نەکراوە.