لە 1ی تشرینی یەکەمەوە، هەر خاوەنکارێک کرێکاری نایاسایی وەک شۆفێری گەیاندنی خۆراک یان لە کەرتی تەلارسازیدا دابمەزرێنێت، ڕووبەڕووی سزای دارایی توند دەبێتەوە کە دەگاتە 60,000 پاوەند بۆ هەر کرێکارێک یان 5 ساڵ زیندانیکردن.
ئەم بڕیارە نوێیەی وەزارەتی ناوخۆی بەریتانیا هەموو ئەو خاوەنکارانە دەگرێتەوە کە پێشتر بەهۆی جۆری کارەکانیانەوە (وەک کارکردنی نەرم یان کاتی) لە پشکنینی مافی کارکردن بەدەر بوون.
بەپێی یاسا نوێیەکان، هەموو خاوەنکارەکان پابەند دەکرێن بەوەی دڵنیا ببنەوە کە کارمەندەکانیان پێگەی یاسایی و مۆڵەتی کارکردنیان لە بەریتانیا هەیە. حکوومەت ئامانجیەتی لەم ڕێگەیەوە ئەو هاندانانە نەهێڵێت کە کۆچبەران بۆ کارکردنی نایاسایی ڕادەکێشێتە ناو وڵات، هاوکات ژینگەیەکی کێبڕکێی یەکسان بۆ ئەو کۆمپانیا و بازرگانییانە فەراهەم بکات کە پابەندی یاسان.
ئامارە فەرمییەکانی وەزارەتی ناوخۆ نیشانی دەدەن کە لە ساڵی 2025دا، ڕێژەی دەستگیرکردن بەهۆی کارکردنی نایاسایی لە کەرتی تەلارسازیدا بە ڕێژەی 256% و لە کەرتی گەیاندن و دابەشکردندا بە ڕێژەی 217% زیادی کردووە بەراورد بە ساڵی 2024. ئەم ژمارانە قەبارەی سەرپێچییەکان لەو سێکتەرانەدا دەردەخەن و حکوومەتیش جەخت دەکاتەوە کە بە فراوانکردنی پشکنینەکان، ڕووبەڕووی ئەو خاوەنکارە سەرپێچیکارانە دەبنەوە کە یاساکان دەبەزێنن.
ئەم هەنگاوە لە کاتێکدایە کە پرسی کۆچی نایاسایی و کارکردنی بێ مۆڵەت بووەتە یەکێک لە بابەتە هەرە گەرمەکانی ناوخۆی بەریتانیا. حکوومەتەکانی ئەو وڵاتە لە ساڵانی ڕابردوودا بەردەوام هەوڵیان داوە لە ڕێگەی توندکردنی سزاکان و زیادکردنی چاودێریی سەر سنوور و بازاڕەکانی کار، ڕێگری لە گەشەی دیاردەی کارکردنی نایاسایی بگرن، کە بە وتەی بەرپرسان، کاریگەریی نەرێنی لەسەر ئابووری و سیستەمی کۆمەڵایەتی وڵاتەکە دروست دەکات.
کۆمێنت (0)
تا ئێستا هیچ کۆمێنتێک نەکراوە.