وەزارەتی دەرەوەی ئێران، ئەمڕۆ پێنجشەممە (6ی ئابی 2026)، ڕایگەیاند کە گفتوگۆکانیان لەگەڵ سوڵتاننشینی عومان گەیشتووەتە قۆناغی کۆتایی، بەڵام هۆشداریی دا کە ئەم لێکتێگەیشتنە نوێیە مەرج نییە گەرەنتیی ئاسایشی تەواوەتی لە گەرووی هورمزدا بکات.
لە ڕاگەیەندراوێکی فەرمیدا، وەزارەتی دەرەوە ئاشکرای کرد کە تاران و مەسقەت لەسەر "تایبەتمەندییە جوگرافییەکانی ڕێڕەوەکانی هاتوچۆ" لە ناو گەرووی هورمزدا ڕێککەوتوون. ئەم هەنگاوە ئامانج لێی دیاریکردنی ئەو مەسیرانەیە کە کەشتییەکان دەتوانن پێیدا تێپەڕ بن، بەڵام ئێران جەختی کردەوە کە ئەم ڕێککەوتنە لەگەڵ عومان هێشتا وەک "ئاساییبوونەوەی دۆخەکە" نابینرێت و مەترسییەکان لەو ناوچە ستراتیژییەدا هێشتا ماون.
سەبارەت بە هەوڵە دیپلۆماسییە هەرێمییەکان، وەزارەتی دەرەوە ڕایگەیاند کە لە ئێستادا هیچ پلانێکی فەرمی نییە بۆ سەردانی وەزیری دەرەوە یان سەرۆکی پەرلەمانی ئێران بۆ وڵاتانی پاکستان یان قەتەر. ئەمە لە کاتێکدایە کە پێشتر دەنگۆی ئەوە هەبوو کە تاران دەیەوێت لە ڕێگەی قەتەرەوە فشارە سیاسییەکانی سەر وڵاتەکەی کەم بکاتەوە.
ئەم لێدوانانەی تاران دوای ئەوە دێن کە دۆناڵد ترەمپ، سەرۆکی ئەمریکا، ڕایگەیاندبوو 48 کاتژمێری داهاتوو بۆ دیاریکردنی چارەنووسی دانوستانەکان یەکلاکەرەوە دەبێت. چاودێرانی سیاسی پێیان وایە کە ئێران دەیەوێت لە ڕێگەی عومانەوە تەنها "ڕێڕەوێکی کاتی" بکاتەوە تاوەکو بزانێت ئەمریکا تا چەند ئامادەیە سزاکانی سەر وڵاتەکەی هەڵبگرێت، نەک ئەوەی بە تەواوی دەستبەرداری کارتی فشاری گەرووی هورمز بێت.
گەرووی هورمز وەک شا دەماری وزەی جیهان، هێشتا لە ناو جەرگەی ململانێی نێوان واشنتن و تاراندایە. پێداگریی ئێران لەسەر ئەوەی کە گەرووەکە هێشتا بە تەواوی "ئارام نییە"، وەک پەیامێکی هۆشداریدان بۆ ئەمریکا و هاوپەیمانەکانی لێک دەدرێتەوە کە هەر جۆرە هەڵەیەک لە دانوستانەکاندا، دەتوانێت بارودۆخەکە بگەڕێنێتەوە بۆ خاڵی سفر و دەستپێکردنەوەی پێکدادانە سەربازییەکان.
کۆمێنت (0)
تا ئێستا هیچ کۆمێنتێک نەکراوە.