کارمەندێکی کەشتیی گەشتیاریی (MV Hondius) کە لە وڵاتی هۆڵەندا لە کەرەنتینەدا بوو، دوای ئەوەی ئەنجامی پشکنینەکانی بۆ ڤایرۆسی "هانتا" بە پۆزەتیڤ دەرچوو، دەستبەجێ گوازرایەوە بۆ نەخۆشخانە بۆ وەرگرتنی چارەسەری پزیشکی.
ئەم ڕووداوە لە کاتێکدایە کە کەشتییەکە و سەرجەم ستافەکەی لەژێر چاودێرییەکی وردی تەندروستیدا بوون لە یەکێک لە بەندەرەکانی هۆڵەندا. ڤایرۆسی هانتا، کە بەزۆری لە ڕێگەی قرتێنەرەکانەوە بۆ مرۆڤ دەگوازرێتەوە، دەبێتە هۆی تێکچوونی باری تەندروستی و دروستکردنی کێشەی توند لە کۆئەندامی هەناسەدا.
بەرپرسانی تەندروستی هۆڵەندا ڕایانگەیاندووە کە سەرجەم ڕێکارە پێویستەکانیان گرتووەتە بەر بۆ ڕێگریکردن لە بڵاوبوونەوەی ڤایرۆسەکە لەناو کەشتییەکەدا و پشکنینی ورد بۆ سەرجەم کارمەندانی دیکە ئەنجام دەدرێت. هێشتا سەرچاوەی سەرەکی تووشبوونی ئەم کارمەندە بەو ڤایرۆسە دەستنیشان نەکراوە، بەڵام تیمە پزیشکییەکان ئاماژە بەوە دەکەن کە نەخۆشەکە لە ژێر چاودێرییەکی چڕدایە.
جێی ئاماژەیە، کەشتیی (MV Hondius) یەکێکە لە کەشتییە گەشتیارییە ناسراوەکان و ئەم حاڵەتە دەگمەنەی تووشبوون بە ڤایرۆسی هانتا بووەتە جێی سەرنجی ناوەندە تەندروستییەکانی ئەو وڵاتە، لە کاتێکدا پێشتر هەموو هەوڵەکان بۆ ڕێگری لە ڤایرۆسەکانی دیکە بووە.
کۆمێنت (0)
تا ئێستا هیچ کۆمێنتێک نەکراوە.