بەرپرسی تیمەکانی بەفرڕاماڵین لە ڕێگەوبانی سۆران ڕایگەیاند، دوای شەپۆلێکی چڕی بەفربارین، کۆی گشتیی بەفربارینی ئەمساڵ لە حاجی ئۆمەران گەیشتووەتە 3 مەتر، لە ئێستادا توانراوە ڕێگەی سەرەکیی دەروازەکە بە ڕووی هاتوچۆدا بکرێتەوە.
سەردار مەلا برایم، بەرپرسی تیمی بەفرڕاماڵینی سەر بە بەڕێوەبەرایەتیی چاککردنەوە و پاراستنی ڕێگەوبانی سۆران بە کوردستان تیڤی ڕاگەیاند: شەوی ڕابردوو شەپۆلێکی دیکەی چڕی بەفربارین سنووری حاجی ئۆمەرانی گرتەوە و زیاتر لە 70 سانتیمەتر بەفر باریوە.
ناوبراو ئاماژەی بەوەش دا، لە بەرەبەیانییەوە تیمەکانیان بە بەکارهێنانی ئامێرەکان دەستیان بە ڕاماڵینی بەفر لەسەر ڕێگە گشتییەکان کردووە، خۆشبەختانە توانراوە لە کاتژمێر 10:00ـی بەیانییەوە ڕێگەکان بکرێنەوە و ئاستەنگییەکانی هاتوچۆ لاببرێن، لە ئێستاشدا هاتوچۆ لە ڕێگەی دەروازەی نێودەوڵەتیی حاجی ئۆمەران ئاساییە.
بەپێی ئاماری تیمەکانی بەفرڕاماڵینی دەڤەرەکە، کۆی گشتیی بەفربارینی ئەمساڵ لە حاجی ئۆمەران گەیشتووەتە 3 مەتر، هەروەها تا ئێستا تیمەکان بڕی 155 تۆن خوێیان بۆ ڕێگری لە دروستبوونی بەستەڵەک لەسەر ڕێگەکان پرژاندووە.
کۆمێنت (0)
تا ئێستا هیچ کۆمێنتێک نەکراوە.