كەشناسی: ئەمڕۆ كۆتایی بە شەپۆڵی بەفر و بارانبارین دێت

بەڕێوەبەرایەتی گشتیی كەشناسی و بوومەلەرزەزانی رایدەگەیەنێت كە ئەمڕۆ هەینی كۆتایی بە شەپۆڵی بەفر و بارانبارین لە هەرێمی كوردستان دێت.

كەشناسی سەبارەت بە كەشوهەوای ئەمڕۆ هەینی رایگەیاند: ئاسمان هەوری تەواو دەبێت، بارانی مامناوەند لە سنووری پارێزگای سلێمانی و هەڵەبجە و ئیدارەی ڕاپەڕین و ئیدارەی سۆران بەردەوامی دەبێت، هەروەها لە ناوچەکانی دیكە نمەباران و بارانی مامناوەند بە شێوەی پچڕپچڕ دەبارێت، بەڵام لە ناوچە سنوورییەکان بەفربارین بەردەوامی دەبێت.

راشیگەیاند: ئەمڕۆ هەینی لە کاتەکانی شەودا کەشوهەوا ئاسایی دەبێتەوە و کۆتایی بە شەپۆڵی بەفر و باران لە هەرێمی كوردستان دێت.

سەبارەت بە پلەكانی گەرماش، كەشناسی رایگەیاند: ئەمڕۆ كەشوهەوا سارد دەبێت و پلەکانی گەرما 1 تا 2 پلە نزمتر دەبێت بەراورد بە تۆمارکراوی دوێنێ پێنجشەممە .

بۆ كەشوهەوای سبەی شەممەش، كەشناسی ئاماژەی بەوە دا: ئاسمان نیمچەهەور بۆ پەڵەهەور دەبێت، لە کاتەکانی بەیانی زوودا لە هەندێک ناوچە ئەگەری دروستبوونی تەم هەیە.

هەروەها رایگەیاند: سبەی كەشوهەوا هەر بە ساردی دەمێنێتەوە و پلەکانی گەرمای نزیک دەبێتەوە لە تۆمارکراوەکانی ئەمڕۆ هەینی.

كەشناسی پلەكانی گەرمای پێشبینیكراوی شارەكانی بەمشێوەی خوارەوە خستووەتەڕوو:-

هەولێر: 9 پلەی سیلیزی

سلێمانی: 8 پلەی سیلیزی

دهۆک: 9 پلەی سیلیزی

زاخۆ: 8 پلەی سیلیزی

کەرکووک: 10 پلەی سیلیزی

هەڵەبجە: 8 پلەی سیلیزی

گەرمیان: 12 پلەی سیلیزی