كۆمیسیۆنی باڵای سەربەخۆی هەڵبژاردنەكانی عێراق ئاشكرای دەكات، لە مانگی تشرینی دووەمی داهاتوو (مانگی 11) بۆ ماوەی 9 رۆژ پشوو رادەگەیەنرێت بەهۆی بەڕێوەچوونی هەڵبژاردنی پەرلەمانی عێراق، جەختیش دەكاتەوە كە پشووەكە هەرێمی كوردستانیش دەگرێتەوە.
جومانە غەلای گوتەبێژی كۆمیسیۆنی باڵای سەربەخۆی هەڵبژاردنەكان بۆ میدیاكانی عێراق رایگەیاندووە: بەهۆی بەڕێوەچوونی هەڵبژاردنی پەرلەمانی عێراق، بڕیار دەدرێت بۆ ماوەی 9 رۆژ پشوو لە قوتابخانە و ناوەندەكانی خوێندن رابگەیەنرێت.
راشیگەیاندووە: پشووەكە لە رۆژی 5 تاكو 13ی تشرینی دووەم دەبێت.
جومانە غەلای هەروەها گوتوویەتی: پشووەكە سەرجەم قوتابخانە و ناوەندەكانی خوێندن لە سەرتاسەری عێراق بە هەرێمی كوردستانیشەوە دەگرێتەوە.
گوتەبێژی كۆمیسیۆنی باڵای سەربەخۆی هەڵبژاردنەكانی عێراق جەختیشی كردۆتەوە كە 8 هەزار ناوەندی خوێندن لە تەواوی عێراق بۆ بەڕێوەچوونی هەڵبژاردنی پەرلەمانی عێراق دیاریكراوە.
بڕیارە لە رۆژی 11ی تشرینی دووەمی 2025، هەڵبژاردنی پەرلەمانی عێراق بەڕێوەبچێت كە لە 329 كورسی پەرلەمانی پێكهاتووە.
کۆمێنت (0)
تا ئێستا هیچ کۆمێنتێک نەکراوە.