لە کاتی کارکردن لە پڕۆژەی دووسایدی سەنتەری حاجی ئۆمەران، بۆمبێکی مەترسیدار دەرکەوت كە بۆ سەردەمی كۆن دەگەڕیتەوە و دەتوانێت بۆمبی هێشوویی هەڵبگرێت.
عەلی عەبدولڕەحمان بەڕێوەبەری گشتی کاروباری مینی هەولێر بە (کوردستان تیڤی) راگەیاند: لەلایەن بنکەی ئاسایشیی حاجی ئۆمەران ئاگادار کراینەوە لە هەبوونی بۆمبێکی فڕۆکە لە ناو سەنتەری شارەدێی حاجی ئۆمەران.
راشیگەیاند: بۆمبەكە لە کاتی کارکردن و هەڵکەندنی زەوی بۆ دروستکردنی ڕێگەی سەرەکی جووتسایدی سەنتەری حاجی ئۆمەران دەرکەوتبوو.
عەلی عەبدولڕەحمان هەروەها رایگەیاند: تیمی لە ناوبردنی کەرەستەی تەقەمەنی بەڕێوەبەرایەتییەکەمان دەستبەجێ گەیشتنە شوێنەکە و بینرا کە بۆمبێکی فڕۆکەی مەترسیدارە لە جۆری (PTAB-2.5M) کە هەڵگری بۆمبی هێشوویییە و لەناو ئاوەدانیە.
بەڕێوەبەری گشتی کاروباری مینی هەولێر ئاماژەی بەوەش دا: دوای چۆڵکردن و کۆنترۆڵکردنی ناوچەکە و گرتنەبەری رێوشوێنی سەلامەتی، توانرا بۆمبەکە بە سەلامەتی لە شوێنی خۆیدا لەناوببرێت.
چۆمان / كەریم سمكۆ
کۆمێنت (0)
تا ئێستا هیچ کۆمێنتێک نەکراوە.