سوپای پاسداران لە راگەیەنراوێکدا هەڕەشەی وەڵامدانەوەی هێرشەکانی ئەم بەیانییەی ئەمەریکا بۆ سەر دامەزراوە ئەتۆمییەکانی دەکات و دەڵیت؛ "ئەمەریکا ناتوانێت خۆ لە وەڵامدانەوەی هێزەکانمان دەرباز بکات".
رۆژی یەکشەممە 22ـی حوزەیران، سوپای پاسدارانی کۆماری ئیسلامی رایگەیاند؛ "دەرکەوت ئەمەریکا لە سەرەتای هێرشەکانی ئیسرائیل بۆ سەر ئێران، پاڵپشت و پلانداڕێژەری ئەو سیناریۆیە بووە، ئەوان نە هێزی پلاندانانیان هەیە و نە دەشتوانن خۆ لە وەڵامدانەوە بەهێزەکەی ئێمە دەرباز بکەن".
سوپای پاسداران هێرشی ئەمەریکا بۆ سەر بنکە ئەتۆمییەکانی ئێران بە بێ پلانی و لاوازبوونی لە ناوجەکە ناودەبات و دەشڵیت؛ "بە هێرشکردنە سەر بنکە ئەتۆمییەکانمان، خۆی خستە بەر مەترسی هێرشەکانمان".
زیاتر روونکراوەتەوە؛ "دەزگای هەواڵگری سوپای پاسداران شوێنی هەستان و نیشتنەوەی فڕۆکەکانی ئەمەریکای دەستنیشان کردووە و خراونەتە ژێر چاودێری بۆ بەئامانجگرتن".
لە بەشێکی دیکەی راگەیەنراوەکەی سوپای پاسداراندا هاتووە؛ "چەندین جار ئەوەمان دووپات کردووەتەوە، ژمارە و بەربڵاویی بنکە سەربازییەکانی ئەمریکا لە ناوچەکە خاڵی لاوازی ئەو وڵاتەیە و زۆر بە ئاسانی دەستمان پییان رادەگات".
ئەو راگەیەنراوەی سوپای پاسداران لەکاتێکدایە بەرەبەیانی ئەمڕۆ فڕۆکەکانی ئەمەریکا هێرشیان کردە سەر بنکە ئەتۆمییەکانی فەردۆ، نەتەنز و ئیسفەهانی ئێران و سەرۆکی ئەمەریکا دواتر رایگەیاند، ئێستا بنکەی ئەتۆمی فەردۆ بە تەواوەتی خاپوور کراوە.
کۆمێنت (0)
تا ئێستا هیچ کۆمێنتێک نەکراوە.