ئاگری دارستانەکانی نێوان قودس و تەلئەبیب بەردەوامە

ماوه‌ی چه‌ند رۆژێكه‌ ئەو ئاگرەی له‌ دارستانەکانی نێوان قودس و تەلئەبیب كه‌وتووه‌ته‌وه‌ له‌ سنووری قه‌ڵه‌مڕۆیی ئیسرائیل تا ئێستا لە 11 شوێندا بەردەوامە.

ئه‌مرۆ پینجشه‌ممه‌ 1-5-2025 ڕۆژنامەی (یەدیۆت ئەهرەنۆت) ئیسرائیلی لە هەواڵێکیدا بڵاویكردووه‌ته‌وه‌: 119 تیمی ئاگرکوژێنەوە و 12 فڕۆکەی تایبه‌ت به‌ ئاگرکوژێنەوە لە ناوچە شاخاوییەکانی قودس بەردەوامن لە هەوڵی کوژاندنەوەی ئه‌و ئاگره‌ گه‌وره‌یه‌ن كه‌ دارستانی ناوچه‌كه‌ی گرتووه‌ته‌وه‌.

ئه‌وه‌ش خراوه‌ته‌ڕوو: له‌ ئیستادا ئاگرەکە لە 11 شوێنی جیاوازی دارستانه‌كه‌ بەردەوامە.

ئاژانسی ئه‌نادۆڵی توركیا بڵاویكردووه‌ته‌وه‌: به‌هۆی ئەو ئاگرەوە کە ناتوانرێت کۆنترۆڵ بکرێت، ئیسرائیل داوای هاوکاری نێودەوڵەتیی کردووە و چاوەڕوان دەکرێت ئەمڕۆ لە کۆماری تورکی قوبرسی باکوور و ئیتاڵیاوە هەشت فڕۆکەی ئاگرکوژێنەوە بگەنە ئیسرائیل.

ئافیشای کۆهن، سەرۆکی ئەنجوومەنی ناوچەی ماتیح یەهودا لە لێدوانێکیدا بۆ ته‌له‌فزیۆنی فه‌رمی ئیسرائیل رایگه‌یاندووه‌: ئەگەری هەیە ئاگرەکە بگوازرێته‌وه‌ و ته‌شه‌نه‌ بكات بۆ ناوچەکانی نیشتەجێبوون.

سەرۆکی ئەنجوومەنی ناوچەی ماتیح یەهودا ئاماژەی بەوەش کردووه‌:  نزیکەی 10 هەزار کەس له‌ هاوڵاتییانی سڤیلی ناوچه‌كه‌ گواستراونەتەوە بۆ شوێنی ئارام.