وەزارەتی پلاندانانی عێراق داوای لە سەرجەم هاووڵاتییان كرد لە كاتی بەڕێوەچوونی پڕۆسەی سەرژمێری گشتیدا لە مانگی داهاتوودا لە ماڵەكانیان بمێننەوە و نەچنە دەرەوە.
عەبدولزەهرە هنداوی گوتەبێژی وەزارەتی پلاندانانی عێراق رایگەیاند: رۆژانی 20 و 21ی مانگی داهاتوو لە سەرتاسەری عێراق پڕۆسەی سەرژمێری بەرێوەدەچێت، ئەو رۆژە پشوو دەبێت و هەروەها قەدەغەی چوونە دەرەوەش دەبێت.
راشیگەیاند: ئامانجی سەرەكی بەڕێوەچوونی پڕۆسەی سەرژمێری باشتركردنی ئاستی خزمەتگوزارییەكانە لەسەر بنەمای ئەو سەرژمێرییەی كە دەردەچێت.
هەروەها رایگەیاند: داوا لە تاك بە تاكی هاووڵاتییان لە سەرتاسەری عێراق دەكەین لە ماوەی بەڕێوەچوونی ئەو دوو رۆژەی پڕۆسەی سەرژمێریدا لە ماڵەكانیان بمێننەوە، چونكە بابەتێكی گرینگە و سوودی بۆ نەوەكانی داهاتووش دەبێت.
ئەمە لەكاتێكدایە كە پێشتریش ئەنجوومەنی باڵای دانیشتووان بڕیاری دابوو لە رۆژانی 20 و 21ی مانگی داهاتوو قەدەغەی هاتووچۆ لەناو شار و لەنێوان پارێزگاكان رابگەیەنرێت بەهۆی بەڕێوەچوونی پڕۆسەی سەرژمێری گشتیی لە عێراق.
کۆمێنت (0)
تا ئێستا هیچ کۆمێنتێک نەکراوە.